Аслă шкулсенче тӳлевсӗр вырăнсем нумайланаççӗ

Çӗршыври аслă шкулсенче ытларах та ытларах çамрăк тӳлевсӗр вӗренме пултарать халь. Çак кăтарту кăçал та çаплах пулӗ. Кун пирки ӗнер ММСО-2024 курав-форумра РФ Патшалăх Думин Наука тата аслă пӗлӳ комитечӗн председателӗн пӗрремӗш çумӗ Александр Мажуга каланă. 

— Паян 11 класс пӗтерекенсенчен 60 проценчӗ университетсенчи бюджетлă вырăнсене вӗренме кӗрет. Колледжсемпе техникумсенче те 600 пине яхăн тӳлевсӗр вырăн, — тенӗ вăл. 

Эксперт патшалăхшăн чи кирлӗ специалистсем камсем пулнине те асăннă. Паянхи кун чи кирлӗ топ-5 профессисем çаксем: 1-мӗш вырăнта — инженерпа техника специалисчӗсем, 2-мӗш — педагогсем, 3-мӗш — врачсем, 4-мӗш — IT-сфера специалисчӗсем, 5-мӗш — ял хуçалăх ӗçченӗсем.

Сăнӳкерчӗк ТР Вӗрентӳпе наука министрествин пресс-службин.