Кашни çаврăмра туслăх

Ноябрӗн 4-мӗшӗ чăннипе çак уявăн кульминацийӗ пулчӗ. М.Джалиль ячӗллӗ Тутар патшалăх академи оперăпа балет театрӗнче «Пирӗн кил – Тутарстан» этнокультура фестивалӗн гала-концерчӗ пулчӗ. Ку фестивале халăхсен хушшинчи туслăха çирӗплетес тӗллевпе 2012 çулта пӗрремӗш хут ирттернӗ.
Уяв каçне Тутарстан Премьер-министрӗ Алексей Песошин уçрӗ. Вăл пурне те Халăхсен пӗрлӗхӗн кунӗпе саламларӗ. Çӗршывра пурăнакансен хăйнеевӗрлӗхӗ – пӗр чăмăра пуçтарăнса çӗршывшăн кар тăма пултарнинче тесе шутлать вăл.

«XVII ӗмӗр пуçламăшӗнче те çапла пулнă, Тăван çӗршывăн Аслă вăрçи вăхăтӗнче те, халӗ ятарлă çар операцийӗ пынă чух та çаплах. Тӗрлӗ халăх çыннисем, тӗрлӗ тӗн конфессине тытса пыракансем ума пӗр тӗллев лартса хастарлăх, паттăрлăх кăтартаççӗ. Тылра гуманитари пулăшăвӗ хатӗрлекенсем, çарти ентешӗсене пулăшакансем чăннипех хастарлăх кăтартаççӗ. Историрен лайăх пӗлетпӗр, халăхсем пӗрле пулсан нимӗнле тăшман та çӗнтереймест пире – пӗрле эпир вăй», – терӗ вăл. 

Алексей Валерьевич республикăра халăх илемлӗ пултарулăх коллективӗсене аталантарма, Тутарстанра пурăнакан нацисен культурисене упрама условисем туса парасси яланах приоритетра пулнине палăртрӗ.  Тутарстанри халăхсен килӗшӗвӗшӗн тăрăшакансене республика наградисене пачӗ. 

Çакăн хыççăн вӗçӗ-хӗррисӗр илемлӗ ташăсем, юрăсем уяв каçне малалла тăсрӗç. Çулран çул «Пирӗн кил – Тутарстан» фестивале республикăри районсем йышлă хутшăнаççӗ. Ăна 2012 çулта Тутарстан Республикинче пурăнакан халăхсен пӗрлӗхне, килӗшӗвне упрас тӗллевпе, туслăхне çирӗплетессишӗн пуçарнă. 13 çул хушшинче фестивальте 30 пин ытла çын хутшăннă. Кăçал 433 заявка йышăннă йӗркелӳçӗсем. Гала-концертра 31 муниципаллă районтан илемлӗ пултарулăх коллективӗсем сцена çине тухрӗç – 1,5 пин çын. Чăваш культурине оперăпа балет театрӗн сцени çинчен Çырчаллинчи «Чӗкеç» (ертӳçи Елена Кондюкова) фольклор ансамблӗ кăтартрӗ.

Концерта профессиллӗ артистсем те хутшăнчӗç – РФ тата ТР халăх артистки Венера Ганеева, ТР культурăн тава тивӗçлӗ ӗçченӗ, Г.Тукай ячӗллӗ преми лауреачӗ Миляуша Таминдарова ертсе пыракан ТР патшалăх камерлă хорӗ, Дмитрий Железнов ертсе пыракан арçын ачасен хорӗ. СВО ветеранӗсем «Добробат» (ертӳçи Валерий Чамрин) ансамбль йӗркеленӗ. Вӗсене залра ларакансем питӗ ăшшăн йышăнчӗç, темӗнччен алă çупса тав турӗç. 

Фестивале йӗркелекенсем 2024 çул Раççейре Çемье çулталăкӗ пулнине асрах тытнă – тутар, чăваш, вырăс, удмурт, мари, мордва халăхӗсенчен пӗрер пултаруллă çемье сцена çине тухса «Отчий дом» (авторӗсем Евгений Мартынов, Андрей Дементьев) юрă юрларӗç. Чăваш наци çемйине Чаркинсем кăтартрӗç. Сергейпе Сильвия Чаркинсем хӗрӗсемпе Софияпа Стефания чăн-чăвашла тумланса тухрӗç.   
Уяв концерчӗ пурте лайăх пӗлекен юрăсене пӗрле караоке юрланипе вӗçленчӗ. 
 
Татьяна ВАСИЛЬЕВА.
«Татар-информ» ИА  сăнӳкерчӗкӗсем.