Крымра «Казанский» сквер уҫӑлчĕ
Крым Республикинчи Форос поселокӗнче ҫӗнетнĕ клуба Тутарстан Республикин Раисӗ Рустам Минниханов ҫитсе курнă. Крым Республикин ертÿçипе Сергей Аксеновпа пӗрле Рустам Минниханов клуба тӗпрен юсассипе тата юнашар вырнаҫнӑ сквера хӑтлӑх кӗртессин пахалӑхне хакланă.Ҫак ӗҫсене Тутарстан Республики пулӑшнипе ирттернӗ.
Клуба хальхи йышши оборудованипе тата техникӑпа тивĕçтернĕ. Кунта секцисемпе кружоксем ӗҫлӗҫ, культурӑпа массӑллӑ тата информаципе ҫутӗҫ мероприятийӗсем, мастер-классем, кинокӑтартусем ирттерӗҫ. Унсӑр пуҫне клубра ветерансен хорӗ тата робототехника кружокӗ пулӗ.
Скверта çĕнĕ спорт площадкисем, таканкка, кану зонисем вырнаҫтарнӑ. Территорие сывлăх енчен çирĕпех мар граждансем валли те меллĕ тунă. Клубпа сквер ҫывӑхӗнчи ҫыран зонине тирпей кӗртнӗ, унта шезлонгсем вырнаҫтарнӑ.
Аса илтеретпӗр, Ялта хула администрацийӗн пуҫлӑхӗ Янина Павленко 2021 ҫулхи ҫурла уйӑхӗнче Тутарстан Республикин Раисĕ Рустам Минниханов патне юсав ӗҫӗсем ирттересси пирки пуҫарупа ыйтса ҫырнӑ. Икӗ ҫул иртсен проекта вӗҫленӗ. Ҫӗнетнӗ сквера «Казанский» ят пама йышӑннӑ.
Рустам Минниханов Форос поселокӗнче пурӑнакансене çĕнетнĕ клуба уçнӑ ятпа саламланă.
Крым Республикин Пуҫлӑхӗ Сергей Аксенов Рустам Минниханова тата клубпа сквера ҫӗнетес тӗлӗшпе ӗҫлекенсене пурне те тав тунă. «Паян эпир Рустам Нургалиевич клуба пӑхса ҫаврӑнтӑмӑр. Юсав ӗҫӗсемпе тирпей-илем кӗртессине спонсор укҫи-тенки шучӗпе пурнӑҫланӑ, федераци субсидийĕпе оборудовани туяннӑ. Рустам Нургалиевичпа унӑн командине тав тӑватӑп», – тенӗ Сергей Аксенов.
Тутарстан Республикин Раисĕн пресс-службин материалĕсем тăрăх.
Сăнÿкерчĕк tatarstan.ru сайтран.
Следите за самым важным и интересным в Telegram-каналеТатмедиа
Нет комментариев