Паян Казахстанра хăйӗн ӗçне KamaTyresKZ завод пуçланă

Пӗрремӗш автошинăна туса кăларнă церемоние хутшăннă вăхăтра Тутарстан Президенчӗ Рустам Минниханов икӗ енлӗ хутшăнусем кашни çул анлăланса пынине палăртнă: «Ӗçлӗ çыхăнусем Раççейпе Казахстан хушшинчи çыхăнусене çирӗплетеççӗ». 
Каярах вăл Астанара Казахстан Президенчӗпе Касым-Жомарт Токаевпа тӗл пулнă. Енсем кăçалхи 9 уйăхра Тутарстанпа Казахстан хушшинчи тавар çаврăнăвӗ 466 млн доллара çитнине палăртнă. Пӗлтӗрхипе танлаштарсан – ӳсӗм ултă процент. 
Унччен Казахстана покрышкăсене ют çӗршывсенчен илсе кӗнӗ пулнă. Унта завод тума «Татнефть» 2021 çулхи апрель уйăхӗнче пуçланă. Казахстанри машинасем кăларакан Allur холдинг Тутарстанри компанин партнерӗ пулса тăнă. Allur хăйӗн завочӗсенче Chevrolet, Kia, JAC, JAC Trucks, Lada машинасем кăларать. Çӗнӗ шина предприятийӗ  çăмăл машина валли 3 млн тата йывăр тиевлӗ машина валли 500 пин покрышка кăлармалла. Тулли хăватпа вăл 2024 çулта ӗçлесе кайӗ.