Тутарстанра иртнӗ эрнере ялсемпе район центрӗсенче Сабантуй иртрӗ. Çырчаллинче тата Эльметре уява июнӗн 13-мӗшӗнче ирттерме палăртнă, Хусанта Сабантуй июнӗн 20-мӗшӗнче пулать. Уява халалласа «Татар-информ» информаци агентстви «Нарядный Сабантуй-2026» конкурс пуçланни çинчен пӗлтерет.
Унта хутшăнса республикăра пурăнакансем наци тумӗн илемне кăтартма, хăйсен çемйин тата хăйсен халăхӗн йăли-йӗрки çинчен каласа пама пултараççӗ. Кун валли июнӗн 26-мӗшӗччен наци тумне тăхăннă çемье сăнӳкерчӗкне #НарядныйСабантуй2026 хештегпа «ВКонтактере» вырнаçтармалла. Çавăн пекех çемье хушаматне тата ăçта пурăннине кăтартма манмалла мар. Сăнӳкерчӗкре çемье – мăшăрсем, ачасемпе ашшӗ-амăшӗ, пӗртăвансем, çавăн пекех кукамăшӗсемпе аслашшӗсем – пулмалла.
Конкурса 2026 çулта иртнӗ Сабантуй вăхăтӗнче ӳкернӗ сăнӳкерчӗксене çеç йышăнаççӗ. Пӗр çемьерен – пӗр сăнӳкерчӗк. Уйрăм çынсен е пултарулăх коллективӗсен конкурса хутшăнмаççӗ. Конкурса ирттернӗ вăхăтра хутшăнаканăн «ВКонтактери» профилӗ уçă пулмалла.
Конкурс икӗ тапхăрпа иртет. Малтан эксперт комиссийӗ чи лайăх 30 сăнӳкерчӗке суйласа илет. Июлӗн 1-мӗшӗнче вӗсене «Татар-информ» сайтӗнче пичетлеççӗ. Унта вулакансем кăмăла каякан ӗçсемшӗн сасăласа çӗнтерӳçӗсене палăртаççӗ. Сасăлав вăхăтӗнче ботсемпе усă курнине палăртсан ӗçе конкурсран кăларма пултараççӗ. Фотоконкурса июлӗн 8-мӗшӗнче – Çемье, юрату тата шанчăклăх кунӗнче – пӗтӗмлетеççӗ.
Нет комментариев