Сентябрӗн 26-28-мӗшӗсенче Чечня Республикинче Тутарстанăн культура кунӗсем иртрӗç

Сентябрӗн 26-мӗшӗнче Чечня Республикинче Тутарстанăн культура кунӗсене  М.Ю. Лермонтов ячӗллӗ Вырăс патшалăх драма театрӗнче хаваслă лару-тăрура уçрӗç.Мешехене ЧР тата ТР Правительствисен çумӗсем Муса Дадаевпа Марат Ахметов хутшăнчӗç. Марат Готович ТР Раисӗн Рустам Миннихановăн саламне çитерчӗ.

Уява малалла Атня хулинчи  Г.Тукай ячӗллӗ Тутар патшалăх драма театрӗ Ахмед Файзин произведенийӗ тăрăх лартнă «Чайки» спектакль  тăсрӗ. Çав вăхăтрах Урус-Мартан хулинчи У.Димаев ячӗллӗ Культура керменӗнче те Тутарстанăн культура кунӗсем уçăлчӗç, унта ТР патшалăх камернăй хорӗ куракансене савăнтарчӗ. Чечня халăхне Тутарстан режиссерӗсен «Мулла», «Тарлан», « Ибн Фадлан», «Мы- дети 41-го» фильмӗсене те кăтартрӗç. Тутарстанăн культура кунӗсене ТР Патшалăх юрăпа ташă ансамблӗ хитре концертпа вӗçлерӗ. (Сăнӳкерчӗксем ТР Культура министерствин сайтӗнчен).