Тольяттире пурăнакан Владимир Левуков çырнă сăвă

Аксу таврашĕ чаплă ен.

Вăл чаплă пулнă ĕлĕкрен.

Пуян тулли уй-хирĕпе,

Пуян вăл хăйĕн çыннипе.

Нумай пулмасть Хасан Туфан

Юп курчĕ çĕр çирĕм çултан.

Ак, халь черечĕ Шелепин.

Ăна та чыс-хисепĕ пин!

…Тăри хĕрсе юрланă чух,

Ака-суха вĕçленнĕ чух

Çак ен, илемлĕ çут тĕнче

Çуратнă халăх шăпчăкне.

Итленĕ вăл ача чухнех

Тăван асламăш чĕлхине.

Халап-юмах, чăваш юрри…

Мул пек пухайнă ун чĕри.

Илсе Ашмарин сĕнĕвне

Тĕпченĕ халăх сăмахне.

Калемĕ куçнă пĕр канми

Шăраннă пурнăçра курни.

Çак пурлăх ăс-тăнра тулсан,

Сăмах пуххи чунра пулсан,

Ун уçă витĕмлĕ сасси

Ăçта кăна-ши янраман?

Хĕвел пек çутă шанчăкпа,

Чĕкеç пек «ылтăн çунатпа»

Юрланă сăвăç халăхра –

Тăван енре, Шупашкарта.

Кив Тимушкел, Ӳсел, Сĕнче,

Шух Хăнтăрча та Çарăмсан…

Çак тăрăхри çĕр-шыв çинчен

Ун пек никам хастар çырман.

Сăнланă йывăр пурнăçа –

«Çĕлен», «Раççей»,е «Ваçанкка» -

Унта веçех чăн сăнарсем-

Харампырсем те сĕлĕхсем.

Мĕн чул-ши сăвăç тарăхман,

Раççей шăпишĕн кулянман?

Хĕрхеннĕ выç варлисене,

Питленĕ юнĕçенсене.

Тен, илтĕпĕр хăш-пĕринчен

Ăнланманне вăл çырнинче.

Выçса курман чух, пĕр тесен,

Пĕлеймĕн çăкăр мĕн хакне.

Вăл тĕрĕс çырнă ун чухне

Хĕн-хурлă пурăнăç çинчен.

Ун юрă-кĕвĕ, хайлавне

Манмасть чăваш, хаклать тĕнче.

Мухтав поэзи праçникне!

Çĕр хĕрĕх çул Шелепине.

Пĕрремĕш халăх шăпчăкне

Чыслать Аксу кĕрекере!