Хусан федераллă университечӗ хăйӗн 220 çуллăхне I Александр императора халалланă бюста уçса паллă тăвать

Хусан (Атăлçи) федераллă университет кăçал 220 çул тултарнине паллă тăвать, юбилей ноябрӗн 17-мӗшпе тӗл килет. Çак пӗлтерӗшлӗ пулăма Тутарстанри тӗп аслă шкул тӗрлӗ мероприяти ирттерсе паллă тума хатӗрленет. 

Раççейӗн вӗрентӳ сферинчи ХФУ пӗлтерӗшӗ пысăк. Сумлă юбилейпе университета РФ Президенчӗ Владимир Путин, ТР Раисӗ Рустам Минниханов саламлă çырусем янă. 

«Чапа тухнă аслă шкулăн мухтавӗ вăл — талантлă выпускниксен кагорти. Вӗсем Тăван çӗршывăн экономика, медицина, вӗрентӳпе наука, литературăпа культура сферисене пысăк тӳпе кӗртнӗ. Хăйсене педагогикăра, обществăлла ӗçре, патшалăх тата çар службинче тупнă», — тенӗ саламлă çырура Владимир Путин. 

Рустам Минниханов ХФУ чи авторитетлă Раççейӗн аслă шкулӗсен шутне кӗнине палăртнă. «Паян ХФУ анлă профильлӗ университетсен шутӗнче сумлă вырăн йышăнать. Ку унăн авторитетне, наукăпа вӗрентӳ ӗçӗнчи пысăк çитӗнӗвӗсене çирӗплетсе парать. Йăлари направленисемпе пӗрле кунта çӗршыври, республикăри актуаллă задачăсене татса пама кирлӗ çӗнӗ программăсем те анлă пурнăçланса пыраççӗ», — тенӗ ТР Раисӗ. 

220 çул хушшинче çак аслă шкултан чылай паллă çын вӗренсе тухнă, вӗсен хушшинче тӗнче шайӗнчи ученăйсем, политика, культура, наука деятелӗсем, паллă çыравçăсемпе поэтсем тата ыттисем. Пирӗн хисеплӗ Иван Яковлевич Яковлев та Хусан университетне пӗтернӗ. 

Паллах, пултаруллă математика Николай Иванович Лобачевские палăртса хăвармалла. Сăмах май, 1804 çулта Хусанти Император университетне I Александр патша уçнă. Николай Лобачевский Император университетне 1807 çулхи февралӗн 14-мӗшӗнче вӗренме кӗнӗ, ун чухне вăл 14-ра пулнă. 40 çул çак аслă шкулта ӗçлесе тарăн йӗр хăварнă ун историйӗнче. Çавăнпа паян университет ун ячӗпе хисепленет те. 

ХФУ историйӗ пирки нумай интерслине каласа пама пулать. Хальхи вăхăтра вăл ертӳçӗ вузсен шутӗнче. Халăхсен хушшинчи рейтингӗ те ун лайăх, нумай енӗпе топ-100 шутне кӗрет. 

Ют çӗршывсенче те ун пирки лайăх пӗлеççӗ, филиалсем ӗçлеççӗ, çулсерен тӗрлӗ çӗршывран вӗренме килеççӗ. Пӗлтӗр сăмахран Египетра филиал уçăлнă, Узбекистанри ăнăçлă ӗçлесе пырать. 

Çак тата ытти пирки ТР Министрсен Кабинетӗнче иртнӗ брифингра ХФУ ректорӗ Ленар Сафин пӗлтерчӗ. Спикерсен шутӗнче унсăр пуçне пӗрремӗш проректор — наука ӗçӗ енӗпе проректорӗ Дмитрий Таюрский, вӗрентӳ енӗпе проректорӗ Екатерина Турилова, экономикăпа стратегилле аталану ыйтăвӗсемпе проректорӗ Марат Сафиуллин, тулашри çыхăнусен проректорӗ Тимирхан Алишев хутшăнчӗç. 

Ленар Сафин палăртнă тăрăх, юбилейпа çыхăннă чылай мероприяти иртет, вӗсене хутшăнма Раççейӗн паллă наука ӗçченӗсем килме тунă. Пӗлтерӗшлӗ пулăмсен шутӗнче — I Александр императора халалласа бюст уçасси. Ректор сăмахӗпе, çапла майпа университета йӗркелекене хисеп тума шутланă. 
Ноябрӗн 21-23-мӗшӗсенче Юбилей мероприятийӗсене РФ Правительство Председателӗн çумӗ Дмитрий Чернышенко, РФ Президенчӗн Канашçи Игорь Левитин, РФ Президенчӗн Пулăшуçи Владимир Мединский килесси паллă. 

Торжествăлла мероприяти М. Джалил ячӗллӗ оперăпа балет театрӗнче иртет. Студентсем валли «Татнефть аренăра» концерт пулать, унта «Добро» ушкăна чӗнсе илнӗ. 

Университетăн пуласлăхӗпе Тимирхан Алишев, халăхсен хушшинчи рейтингпа Марат Сафиуллин, наука ӗçӗсемпе Дмитрий Таюрский паллаштарчӗç. Кун пирки тӗплӗнрех «Сувар» хаçатăн çитес номерӗнче вуласа пӗлме пулӗ.

Сăнӳкерчӗксем https://prav.tatarstan.ru сайтран.