Пăвасем репетицисӗр салтака каймаççӗ

Хальхи вăхăтра Раççейре çурхи призыв кампанийӗ пырать. Июлӗн 15-мӗшӗччен çӗр-çӗр каччă çар ретне тăрӗ. Чăваш ялӗсенче те хурлăхлă салтак юррисем янăрама пуçларӗç. Хӗсмет иртмелли срок халӗ çулталăк кăна пулсан та, атте-аннене ывăлне çара яма çăмăл мар.

Салтака ăсатас йăла чăвашсен хурлăхлă, тарăн философиллӗ. Ку ӗнтӗ ӗлӗк хӗсмет служби 25 çула тăсăлнипе яш каччăн каялла таврăнас шанăçӗ пӗчӗккипе те çыхăннă пуль-ха. Çавăнпа тăвансемпе, ял-йышпа ӗмӗрлӗхех сывпуллашнă вăл. Ялсенче йăла халӗ те сыхланса юлнă-ха, чăн та, юррисен сăмахӗсем майпен манăçа тухса пыраççӗ. Йăлана сыхласа хăварас тӗллевпе темиçе çул каялла «Сувар» хаçат «Никрут юрри» фестиваль-конкурсне пуçарнăччӗ. Пăва районӗ фестиваль -конкурса кăçал малалла тăсма шутлать. Кунти ЧНКЦ апрелӗн 24-мӗшӗнче иртнӗ ларăвӗнче «Никрут юррисем» район фестиваль-конкурсне майăн 9-мӗшӗ тӗлӗнче Альшихри Культура çуртӗнче ирттерме йышăннă. Çапла майпа Пăва тăрăхӗнчи салтак çулне çитнӗ каччăсемшӗн вăл ахаль мероприяти кăна мар, пурнăçри чи яваплă самант - çара кайни - умӗнхи репетици те пулӗ. (К. Малышев сăнӳкерчӗкӗ).