Тутарстан Патшалăх Канашне депутата суйланакан кандидатсене массăлла хыпар хатӗрсем тӳлевсӗр тӳрӗ эфир вăхăчӗпе тата пичет вырăнӗпе тивӗçтерессипе жеребьевка пуçланчӗ

Патшалăхăн телевиденипе радио тата пичет кăларăмӗсем депутата суйланакансене тӳлевсӗр эфирпа тата пичет вырăнӗсемпе тивӗçтерессипе жеребьевкăна ӗнер — августăн 7-мӗшӗнче пуçларӗç те паян вӗçлеççӗ. Политика партийӗсенчен тăратнă кандидатсене те, пӗр мандатлă округсенче регистрациленнӗ кандидатсене те пӗр пекех вырăн уйăрса параççӗ. Жеребьевка кандидатсен агитаци вăхăчӗ хăçан эфира тухассине е пичетленессине йӗркелеме кирлӗ. Ӗнер жеребьевка 1-мӗшпе 25-мӗш округсенче регистрациленнӗ кандидатсен хушшинче иртрӗ, паян, августăн 7-мӗшӗнче 26 — 50-мӗшсен хушшинче. 

— Законпа килӗшӳллӗн, кандидатсемпе политика партийӗсене суйлав кампанине хутшăнма пӗр пек майсемпе тивӗçтереççӗ тата тӳлевсӗр эфир вăхăчӗ парăнать. Ку чи кирлӗ принцип. Пирӗн, йӗркелӳçӗсен, суйлав процессне уçăлăхпа, легитимноçпа тивӗçтермелле, — терӗ ТР Тӗп суйлав комиссийӗн Председателӗ Андрей Кондратьев. 

Çитес суйлавра тӳлевсӗр эфир вăхăтне регионри виçӗ патшалăх телерадиокăларăм организацийӗ тивӗçтерет: «Татарстан» патшалăх телерадиокомпанийӗн 2 телеканалӗпе 1 радиоканалӗ, «ТНВ» АО 1 телеканалпа 1 радиоканал, «ТАТМЕДИА» АО 2 телеканалпа 5 радиоканал уйăрнă. 
Унсăр пуçне партисемпе кандидатсен пичет кăларăмӗсенче те тӳлевсӗр агитаци материалӗсене вырнаçтарма ирӗк пур. Ăна регионри патшалăхăн 84 хаçат-журналӗ пама хатӗр. Çав шутра «Республика Татарстан» тата «Ватаным Татарстан» хаçатсем. Редакцисем жеребьевкăна августăн 8-мӗшӗччен хăйсем тӗллӗн ирттереççӗ. 

Патшалăх Канашӗн депутачӗсен 7-мӗш пухăвӗн суйлавӗн агитаци тапхăрӗ августăн 10-мӗшӗнче пуçланать те суйлавччен пӗр кун маларах сентябрӗн 7-мӗшӗнче 00 сехет те 00 минутра вӗçленет. Суйлав сентябрӗн 8-мӗшӗнче тытăнать, участоксем ирхине 7:00 сехетрен пуçласа каçхине 20:00 сехетчен ӗçлӗç.

Михаил Захаров тата izbirkom.tatarstan.ru сăнӳкерчӗкӗсем.