Çамрăксем ял хуçалăхне çӗклесшӗн

Форумăн тӗллевӗ — агропромышленность секторӗнче хальхи вăхăтри çӳллӗ технологиллӗ оборудовани çитсе пыманнине пӗтересси.
Мероприятире ТР çамрăксен ӗçӗсен министрӗн пӗрремӗш çумӗ Софья Галиева-Мустафина, Хусанти патшалăх аграри университечӗн инфраструктура аталанăвӗпе тата производство енӗпе проректорӗ Наиль Хамидуллин, «ТР Суту-илӳпе промышленность палати» союзăн председателӗн пӗрремӗш çумӗ Артур Николаев тата Еврази Департаменчӗпе Китай Суту-илӳ палатин директорӗ Шен Гофей хутшăннă.
 «Уйрăмах ял хуçалăхӗнче студентсене ӗçе хăнăхтарни çӗршыв пуласлăхӗшӗн питӗ пысăк пӗлтерӗшлӗ утăм. Çамрăксем çӗр ӗçӗнче опыт илеççӗ, ял хуçалăхӗ пӗтӗм обществăшăн кирлине ăнланаççӗ тата хăйсем те тавар туянакана паха продукципе тивӗçтерме пуçлаççӗ. „Кăна ахаль ӗç тесе калаймастăн, патриотла тивӗç тени тӗрӗсрех, мӗншӗн тесен çӗр çинче паха, нумай тухăç илни çӗршыва тăнăçлăрах тăвать“, — пӗлтерчӗ хăй шухăшне Софья Галиева-Мустафина.
Студентсен ял хуçалăхӗнче тăрăшакан отрячӗсен ӗçӗ вӗренӳ процесӗшӗн те хаклă. Теорипе çырлахса лармасăр вырăнта пысăк практика иртеççӗ. Вӗреннӗ вăхăтрах ӗç опытне пухаççӗ.
Хальхи вăхăтри çӳллӗ технологиллӗ оборудованипе ӗçлеме ялсенче кадрсем çитменни вăрттăнлăх мар, çак çивӗч ыйтăва татса парасси пирки форумра тухса калаçакансем чылай пулнă.
 Форума хутшăннисем АПК çӳллӗ технологийӗсемпе ӗçлекен площадкăсене те çитсе курнă. Пӗр-пӗрин практикипе паллашса професси аталанăвне илессипе хутшăннă вӗсем. Партнерсемпе, предприятисемпе паллашса малашнехи ӗçлӗ хутшăнусем çинчен калаçса килӗшни студентсен отрячӗсемшӗн ӳлӗм тата кăсăкрах пулӗ, çӗнӗрен те çӗнӗ шанăç уçăлӗ умра.
Форума пӗтӗмлетсе ял хуçалăхӗнчи студентсен çул-йӗр карттине тунă. Ял хуçалăхӗнче ӗçлеме кадрсем хатӗрлессипе тӗплӗн ӗçлеме йышăннă. (И. Кузьмина сăнӳкерчӗкӗ)