Çĕнтерӳ кубокĕ Çĕнĕ Йĕлмелĕнче юлчĕ

Андрей Годунов çак ялтах çуралса ӳснӗ, шкула çӳренӗ. Алла аттестат илсен Ульяновскри строительство колледжне кайса кӗнӗ. Унтанах 2014 çулта çар хӗсметне кайнă, Екатеринбургра иртме тӳр килнӗ ăна. 

2018 çултан Ульяновскра тăракан гварди десант штурм бригадин разведчиксен батальонӗнче службăра тăнă. 

Андрей Годунов Донецк Халăх Республикинчи Белогоровка ялӗ çывăхӗнче паттăрла вилӗмпе вилнӗ. Хастарлăх, паттăрлăх кăтартнăшăн РФ Оборона министерстви Андрей Владимировича «Восток-2018» Çар вăйӗсен маневрӗсене хутшăнакана«, «Кавказра контртеррористла операцие хутшăнакана» медальсемпе, IV степеньлӗ «Георгий хӗресӗпе», Çветтуй Георгий орденӗн паллипе, Паттăрлăх орденӗпе (вилнӗ хыççăн) наградăланă.
Мини-футбола хутшăнакансемпе куракансем турнир уçнă çӗрте Андрей Годунова асăнса 1 минут шăп тăчӗç. 

Андрей хăй те ачаран спортпа туслă пулнă. Шкулта вӗреннӗ чух футболла, волейболла вылянă. Çавăнпа юлташӗсем мини-футбол ирттерес пуçарупа тухнă.
Кăçал турнира 8 команда хутшăннă: «Партизан» (Ульяновск облаçӗ, Улхаш), «Чеботаевка» (Ульяновск облаçӗ), Çӗпрел районӗнчен харăсах темиçе команда — «Городище», «Большая Акса», «Убеи» тата Кивӗ Çӗпрелӗнчен, Чăваш Çӗпрелӗнчен ушкăнсем пулчӗç тата, паллах, хуçасем — «Новое Ильмово».

Раççей Федерацийӗн, Тутарстан Республикин гимнӗсем хыççăн Регионсен хушшинчи турнир уçăлнине пӗлтерчӗç. Мини-футбола хутшăнакансене Çӗпрел муниципаллă районӗн Ӗçтăвком ертӳçи Рустам Искендерович Мухаметзянов саламларӗ. Ятарлă çар операцине хутшăнакансене, гуманитари пулăшăвӗ пухса тӗрев паракансене Алексей Лянкина, Василий Симуллина тата Петр Мискина район ертӳçин ятӗнчен Тав хучӗсем парса чысларӗ. Андрей Годуновăн амăшне Тамара Петровнăна тата мăшăрне Екатерина Олеговнăна асăнмалăх парнесем, чечек çыххисем пачӗ. 

Андрей Владимировичăн чи çывăх çыннисем мини-футбол турнирне йӗркелекенсене тав сăмахӗсем каларӗç.

Çӗнӗ Йӗлмел ял хутлăхӗн пуçлăхӗ Роберт Дружков та пухăннисене А. Годунова халалланă II турнир уçăлнă ятпа саламларӗ. «Щит Отечества» ТР регионсен обществăлла организацийӗн Çӗпрел районӗнчи филиалӗн председателӗ Даниил Ефимов «Çурçӗр Кавказри çапăçусем иртнӗренпе 25 çул» медальпе Александр Патшеева, Николай Антипова тата Юрий Патрина наградăларӗ. Петр Мискина, Владимир Патшеева тата Дмитрий Ларионова «Чечня вăрçин ветеранӗ» паллă панă. 

Йӗркелӳ комитечӗн тата Çӗнӗ Йӗлмел ялӗн футбол клубӗн ятӗнчен турнира хатӗрлесе ирттерме пулăшнăшăн çӗнйӗлмелсен клубӗн капитанӗ Илья Карсаков ял хутлăхӗн председательне Роберт Дружкова, Ветерансен канашӗн председательне Даниил Ефимова, журналиста Геннадий Карсакова, Николай Мадурова тата шкул директорне Владимир Мискина Тав хучӗсем пачӗ. 

Ăмăртăва хутшăннă командăсен тупăшăвне куракансем интересленсех пăхрӗç. Çурма финалта Чăваш Çӗпрелпе Чеботаевка вылянине сăнама уйрăмах кăсăк пулчӗ — 0:0 шутпа вӗçленчӗ вăйă. Пенальти тапса Чеботаевка футболисчӗсем (капитанӗ А. Митрофанов) мала тухрӗç. Турнир таблицинче вӗсем III вырăн йышăнчӗç. Финалта çӗнйӗлмелсем (капитанӗ И. Карсаков) кивçӗпрелсене çӗнтерсе I вырăн йышăнчӗç. 

Йӗркелӳ комитечӗ хастар вылякан футболистсене Хисеп хучӗсем пачӗ: «Чи лайăх вылякан» — Д. Николаев (Çӗнӗ Йӗлмел); «Чи лайăх вратарь» — А. Николаев (Çӗнӗ Йӗлмел); «Чи лайăх хӳтӗлевçӗ» — А. Митрофанов (Чеботаевка); «Чи лайăх тапăнса вылякан» — Эмиль Валиуллин (Кивӗ Çӗпрел).

Йӗркелӳçӗсем турнира хатӗрлесе ирттерме пулăшнăшăн спонсорсене, ялти çар запасӗнче тăракансене, десантниксене, патриотсене тав тăваççӗ.

Геннадий КАРСАКОВ, 
Çӗнӗ Йӗлмел.
Автор сăнӳкерчӗкӗ.