Лениногорскра чăваш çамрăкӗсен лидерне суйланă

Тутарстанри Чăваш наципе культура автономийӗн председателӗн пӗрремӗш çумне Константин Анатольевич Малышева республикăри чăвашсен хушшинче пӗлмен çын çук-тăр. Хастар чăваш юратнă «Сувар» хаçатăн тӗп редакторӗнче ӗçленӗ чухнех чăвашсем йышлă пурăнакан районсене тăтăш тухса çӳретчӗ, паллă чăвашсем çинчен нумай çыратчӗ.

Нумай пулмасть Пăва районӗнчи Пӳркелӗнче çуралса ӳснӗ çыравçăн  пӗрремӗш кӗнеки кун çути курчӗ. «Ачалăхăм» кӗнекене эпӗ питӗ юратса вуласа тухрăм, хăш-пӗр пулăмсем хамăн ачалăха аса илтерчӗç.

Октябрь уйăхӗнче эпир, Лениногорск чăвашӗсем, «Шурă хурăн» чăваш халăх ансамблӗн 35 çулхи юбилейне паллă турăмăр. Савăнăçлă мероприятие Константин Малышев та, «Сувар» хаçат ӗçченӗсем те килчӗç. Çавăн чухне эпир хула чăвашӗсемпе пуху ирттертӗмӗр, Лениногорск районӗнчи Чăваш наципе культура центрӗн ертӳçине суйларăмăр. Нумай çул пире ертсе пынă Ольга Орлова ертӳçӗ тилхепине Ольга Таймухинăна пачӗ. Çак пухура ТР ЧНКА председателӗн пӗрремӗш çумӗ Шупашкартан Вячеслав Христофоров юрăçа тата унăн ушкăнне чӗнсе илесси пирки каларӗ.

Чăн та, ноябрӗн 15-мӗшӗнче Лениногорск чăвашӗсем Шупашкар артисчӗсене тулли залпа кӗтсе илчӗç. Питӗ чаплă концерт куртăмăр. Тавах ăна йӗркеленӗшӗн Константин Анатольевича.

Çак кун Лениногорск районӗнчи чăваш çамрăкӗсен лидерне те суйларăмăр. Ку тивӗçе малашне Лениногорскри музыкăпа ӳнер педколледжӗнче вӗренекен Софья Ефарова, Çӗнӗ Шешкел пики,  пурнăçласа пырӗ. Ăнăçу сунатпăр Софйăна çак пархатарлă ӗçре.

Геннадий САДОВНИКОВ,

ТР ЧНКА пайташӗ.

Автор архивӗнчи сăнӳкерчӗк.