Пăлхар фестивале чӗнет

Августăн 16 — 18-мӗшсенче Пăлхарта «Раççейӗн ăс-хакăл пӗрлӗхӗ — тӗнчене чӗнсе калани!» («Духовное единство России — послание миру!») фестиваль иртет 
Икӗ пайран тăракан пысăк фестивалӗн 1-мӗш пайӗ 2024 çулхи июль вӗçӗнче Свияжск утрав-хулинче чаплăн иртни çинчен «Сувар» çырса кăтртнăччӗ. Унта вырăс- правослаи христианӗсен культри çине пусăм тунăччӗ. 
Халӗ Пăлхарта иртекен пайӗ, вулакан ăнланса илчӗ пулӗ ӗнтӗ, мăсăльман тӗнӗпе, тутар халăх культурипе çыхăннă. 
Фестиваль хӳттипе иртекен мероприятисенчен чылайăшӗнче эпир пулса курма ӗлкӗрнӗ те ӗнтӗ. Тӗслӗхрен, вăтам ӗмӗрсенче Пăлхарти пит паллă пасар майлă йӗркеленӗ «Ага базар» кăçал 6-мӗш хут иртет. Яланхи пекех Пăлхара республикăри, таврари регионсенчен çеç мар Раççейӗн инçетри кӗтесӗсенчен те ал ăстисем килӗç. Хăйсем ăсталанă япалисене сутӗç. Эльмир Низамовăн «Кара Пулат» эпикăллă оперине фйестивалӗн пӗрремӗш кунӗнче истрилле вырăнта çӗр çине аç сӗмӗ ансан кăтартӗç. Кăнтăрлахи концерт программинче «халăх ансамблӗ» ята илнӗ республикăри коллективсем çак ята хӳтӗлесе пултарулăхне кăтартӗç. 
Тата та çӗнӗлӗхсем пур. Тутар халăх ташшин хусканăвӗсене хăнăхтарассипе мастер-класс ирттереççӗ. «Каләм-гарәби галәм» араб графикин каллиграфийӗн куравӗнче Владимир Попов, Наджип Наккаш, Ришат Саляхутдинов, Гульназ Исмагилова ӗçӗсене курма пулать. Çавăн пекех унта шамаилсем, тезхибсем пулаççӗ. 
Икерчӗпе сăмавартан курăк чӗйӗпе хăналассине те программăна кӗртнӗ. 
Фестивалӗн иккӗмӗш кунӗнче этнокультура еткерне упраса хăварассипе çавра сӗтел иртет. Паянхи тумсен дизайнерӗсем, йăла-йӗркесене тӗпчекенсем пухăнса канашлӗç унта. 
Енчен те пӗлтӗр, ытти çул кӳршӗллӗ регионсенчен килнӗ музыка коллективӗсен пултарулăхӗпе киленеттӗмӗр-тӗк, кăçал респуликăн тӗрлӗ районӗсенчен килнӗ музыкантсем фестивале пынисен канăвне илем кӳрӗç. Эльметри этно музыка коллективӗ «Кадим Әлмәт», паллă рэп-юрăç Malsi Music, РФ искусствăсен тава тивӗçлӗ ӗçченӗ, Влад Маленко поэт (Мускав), «Otyken» ушкăн (Красноярск), ТР халăх артистки Миляуша Таминдарова ертсе пыракан ТР Патшалăх камерлă хорӗ, «Zakaria» фолк-ушкăн (Хусан), Ильгам Шакиров творчествине халалласа хатӗрленӗ трибьюта Ильгиз, Эльвира, Yummy Music Band хутшăнаççӗ.

Автор сăнӳкерчӗкӗ