Паттăрсене манмастпăр: Пăрăнтăк шкулӗн стени çине Украинăри ятарлă çар операцийӗнче пуç хунă Иван Сидоров сержантăн асăну хăмине вырнаçтарнă

Экспертсем Раççей десантникӗсен операцине пысăк хак параççӗ. Темиçе хут нумайрах та вăйлăрах тăшмана икӗ талăк, пулăшу çитиччен, хирӗç тăнă, йышăннă позицие пурпӗр паман. Куншăн десантниксене «Гостомель паттăрӗсем» тесе каларӗç. Тактикине сывлăш десант çарӗн вӗрентӗвӗнче тата пӗрре мар усă курӗç-ха. Шел, Иван Сидорова çак çапăçура сывă юлма пӳрмен, февралӗн 27-мӗшӗнче паттăррăн пуç хунă.

Вăл 1985 çулта Пăрăнтăк станцийӗнче çуралнă, вырăнти пуçламăш, унтан Элшел шкулӗсенче вӗреннӗ. Пăвари СПТУра –  вăтам, Ульяновскри университетра аслă пӗлӳ илнӗ пулсан та хăйне Тăван çӗршыв хӳтӗлевçинче курнă вăл. 2004 çулта çара кайнăранпа пурнăçне çарпа çыхăнтарнă. 2007 çултанпа Ульяновскри 31-мӗш штурмпа десант бригадинче контрактпа службăра тăнă, хирӗçтăрусен ветеранӗ. 2014 çулта Крымра, 2019 çулта Сирире, 2022 çулта Казахстанра çар тивӗçне пурнăçланă. II степеньлӗ «Çарти хастарлăхшăн», «Крыма тавăрнăшăн», «Сирири çар операцине хутшăннăшăн» медальсене тата ытти нумай наградăна тивӗçнӗ. Шел, тепӗр пысăк наградине – РФ Президенчӗн Указӗпе панă «Паттăрлăхшăн» орденне – çемйин илме тивнӗ. 

Иван Олегович Сидорова Ульяновск хулинче пытарнă пулин те, ентешӗн ятне, паттăрлăхне ял-йыш асӗнче хăварас тӗллевпе тăван ялӗнче те асăну хăми вырнаçтарма шутланă. Сăваплă ӗçе вырăнти ял хутлăхӗн пуçлăхӗ Владислав Ранцев пуçарнă. Спонсорсем пулăшнипе асăну хăмине хатӗрлесе вырнаçтарнă хыççăн ноябрӗн 25-мӗшӗнче уçнă. Церемоние Иван Сидоровăн çывăх тăванӗсем, ял халăхӗ, район администрацийӗн пуçлăхӗ Марат Гафаров хутшăннă. 

Паттăр десантникăн ячӗ Ульяновск хулин халăхӗн асӗнче те юлӗ. Нумай пулмасть кунти Заволжье районӗнчи «Ветерансен аллейинче» портречӗпе ун çинчен çырнă пилон вырнаçтарнă. 

Раççее тӗнче пӗрре мар çăхан евӗр сăхма хăтлансан та чӗрни витмен. Иккӗленместӗп, халӗ те çаплах пулать. Мӗншӗн тесен эпир урăх чустаран, Турăпа, совеçпе пурăнакан халăх. Пирӗншӗн ют хуйхă çук. Украинăри ятарлă çар операцийӗ пуçланнăранпа та акă канăçа çухатман çын çук хушшăмăрта. Окопри кашни салтака пулăшма, хӳтӗлеме Турăран тилмӗрсе ыйтатпăр, пуç хунă кашни ывăл-хӗршӗн чунтан хурланатпăр. Паянхи саманан паттăрӗсен ячӗсем чул çине кăна мар, чӗрере çырăнаççӗ.

А.Сидорова архивӗнчи сăнӳкерчӗксем.