Самокатсем çинчен ӳксе суранланакансен шучӗ ӳссе пырать

Май уйăхӗнче Тутарстанра пурăнакан 35 çын самокатсем çинчен ӳкнӗ хыççăн Республикăри клиника больницине пынă. Çакăн çинчен 1 номерлӗ РКБ-ри травматологи уйрăмӗн заведующийӗ Гамиль Гарифуллов пӗлтернӗ. 

Çӗнӗ транспорт тӗсӗ çине вылямалли япала çине пăхнă пек пăхакансем час-часах электросамокат хăвачӗпе хăвăртлăхне тивӗçлӗ шайра хакласа ӗлкӗреймеççӗ пулмалла. 

«Пирӗн приемный покой урлă кăна май уйăхӗнче самокат çинчен ӳксе тӗрлӗрен травма илнӗ 35 çын иртрӗ», – тесе палăртнă врач.

Больницан травматологи уйрăмӗнче 10 çынна операци тунă. Икӗ çын пӗçӗ шăммисене хуçнă, ыттисен суранӗсем çăмăлтарах.

Травматолог  каласа панă тăрăх, ӳксе сураналаннă çынсенчен çурри 35-40 çулта, ыттисем – 20 çулсенчи çамрăксем.

«Пациентсен хушшинче ӳсӗрле самокат рулӗ умне тăнисем 3-4 çын пурччӗ, вӗсене пурне те операци туса çӗлесе яма тиврӗ», – тенӗ Гарифуллов.