«Сувар» хаçат редакцийӗ Хусанта Медиа-Уяв ирттерчӗ

Медиа-праçниксем ирттересси Хусанта çӗнӗлӗх мар, ăна «ТАТМЕДИА» АО пӗр-пӗр хаçат-журналпа йӗркелесе республика халăхӗсем çинчен çывăхрах каласа парать. Пӗлтӗр, тӗслӗхрен, «Туганайлар» хаçат кӗрешӗнсемпе çакăн пекех паллаштарнăччӗ. Кăçалхи сезона «Сувар» хаçат хăйӗн медиа-Уявӗпе уçрӗ, калас пулать – питӗ вăхăтлă. Тутарстан чăвашӗсен паянхи кун та çуллахи Микуларан пуçласа Питравччен Уяв юррисене юрлас йăли сыхланса юлнă. Республика Уявӗ ку шăматкун, июлӗн 8-мӗшӗнче, Элкел районӗнчи Сиктӗрме ялӗнче пулать. Çавăнпа «Сувар» Уява пуçларӗ тесен те юрать. Медиа-праçнике «ТАТМЕДИА» АО генеральнăй директорӗ Шамиль Садыков уçрӗ. Тутарстанра халăхсем çапла пӗрле килӗштерсе ӗçлесе пурăннине, кун пек медиа-уявсем малашне те йăлана кӗрессине каларӗ.

Медиа-Уява ирттермешкӗн суварçăсене хаçатăн яланхи тусӗсем – Тутарстанри Чăваш хӗрарăмӗсен союзӗ, В.Г.Тимирясов ячӗллӗ Хусанти инновацисен университечӗ, вырсарни шкулӗн чăваш уйрăмӗ, хастар чăвашсем пулăшрӗç. Хусанти «Салам» фольклор ансамблӗ (ертӳçи Светлана Садыкова), çамрăксен «Ӗмӗт» ансамблӗнчи Юлияпа Анжелика Еремеевасен, Лайăш районӗнчи «Веснавея» ансамблӗн солисткисен Елена Макаровăпа Эльвира Савельеван, Софийăпа Стефания Чаркинасен дуэчӗсем тата Хусан консерваторийӗн пултаруллă студенчӗ Семен Леонтьев хăйсен юрри-кӗввипе илем кӳчӗç. 

Уяв сӗтелӗ те тутлă апат-çимӗçе аран йăтса ларчӗ. Кунта та хамăр туссене тав тумалăх пур. Чăваш хӗрарăмӗсен союзӗн пайташӗ Татьяна Романова ятарласа çăкăр, Çӳлтура пурăнакан Вера Гулякова йăвача пӗçерсе килчӗç пулсан харпăр предприниматель Вера Юнусова пурне те тутлă кваспа сăйларӗ. Медиа-Уява пирӗн СММ-специалист Ксения Романова ертсе пынă май пухăннисене Уяв мӗне пӗлтернине ăнлантарчӗ, йăли-йӗркипе паллаштарчӗ. Сăмах май, çав кун чăваш тумне тăхăнса сăн ӳкерӗнме кăмăл пуррисем валли хаçат ятарласа фотозона та йӗркеленӗччӗ.  ТР ЧНКА председателӗн çумӗ, «Сувар» хаçатăн веб-редакторӗ Константин Малышев çемье туприне – мăн асламăшӗ качча тухнă сурпанне – кăтартрӗ, ламран лама куçса пырать иккен вăл Малышевсен çемйинче. Ку кăна марччӗ-ха тӗлӗнмелли. Хӗрарăмсен союзӗ хатӗрленӗ чăваш тумӗн куравӗн «моделӗсенчен» хăшӗ-пӗри асламăшӗ-кукамăшӗн çӗр çул ытла упранакан пир кӗписемпе, чăваш эрешӗсемпе килнӗччӗ. Татьяна Романован кукамăшӗнчен юлнă хушпăвӗ хăй кăна мӗне тăратчӗ. В.Г.Тимирясов ячӗллӗ инноваци университечӗн вашаватлăхпа дизайн факультечӗн деканӗпе Елена Матвеевăпа университет ректорӗн çумӗ Лилия Тимирясова та çемьере упранакан катан пир кӗпесемпе килнӗ. Тумӗсене иртнӗ ӗмӗртех çӗленӗ тесе те калаймăн, паянхи кун та кивелмен вӗсем, питӗ килӗшӳллӗ. 

Анжеликăпа Юлия Еремеевасем медиа-Уява хăйне евӗрлӗ парнепе килчӗç, аслашшӗ çырса кӗвӗленӗ «Мăкăнь» çемье юррине пӗрремӗш хут халăх çине кăларчӗç вӗсем. Пухăннисене Чăваш таврапӗлӳçисен Тутарстанри уйрăмӗн ертӳçи Александр Семенов та саламларӗ. Чăваш хӗрарăмӗсен союзӗн председателӗ Сильвия Чаркина вара Чăваш хӗрарăмӗсен союзӗн йышне кăмăл пуррисене пурне те йышăнма хатӗррине пӗлтерчӗ.

«Сувар» хаçатăн тӗп редакторӗ Ирина Трифонова çакăн пек уяв йӗркелесе ирттерме пулăшнисене, чăн малтан «ТАТМЕДИА» АО генеральнăй директорне Ш.Садыкова, юрăçсене, уяв сӗтелӗ хатӗрлекенсене, хаçатăн çывăх тусӗсене, курма килнӗ çынсене пурне те тав турӗ. 

Чăвашсен медиа-праçникӗ Уяв йăлипех вӗçленчӗ, пухăннисем юлашкинчен пурте картана тăрса авалхи Уяв юррипе хӗвеле май çаврăнчӗç. Апла-тăк, асатте-асаннесен пилне илтӗмӗр тесе шутлатпăр, ӗçӗмӗрсем малашне те ăнса пырасса, вулаканăмăрсем хушăнасса, кун йышши медиа-праçниксене тата пӗрре мар ирттерессе шанатпăр.

Автор сăнӳкерчӗкӗсем.