Тутарстанра каллех бруцеллёз

 Специалистсем бруцеллёз чирӗ сывлăшпа, выльăх апачӗ урлă ернине, çаплах çынсемпе, техникăн кустăрмипе, кăшлакан чӗрчунсемпе кӗме пултарнине калаççӗ. Çӗнӗ технологисемпе усă куракан, талăкне 60-шар тонна сӗт сăвакан (районти мӗнпур сӗтӗн 17 проценчӗ ку), Голштин ăрачӗллӗ выльăхлă мегафермăна хăрушă чир мӗнле лекме пултарнин сăлтавӗсене тӗпчеççӗ халӗ. 

Чиртен сыхланмалли мел яланхи пекех: урăх регионсенчен выльăх туянмалла мар, аш-какайпа сӗт юр-варне 100 градусра пӗçернӗ е вӗретнӗ хыççăн кăна çимелле. Бруцеллёз çынна та ерет. Кун пек чух ӳт температури ӳсет, вăй çук тата ал-ура сыпписем ыратаççӗ.

ТР Министрсен Кабинечӗ çумӗнчи Ветеринарин тӗп управленийӗн специалисчӗсен сăмахӗсем тăрăх, «Тукаевский» хуçалăхри чирлӗ ӗне-выльăха ( 2,5 пин ӗнерен 698-шне) хальхинче те Дагестанри аттестаци иртнӗ ятарлă аш-какай комбинатне ăсатаççӗ, чирлесе ӗлкӗрейменнисене — Атняри выльăх пусакан цеха. Кун пек аш кăлпасси валли кăна юрăхлă,  ăна кунта малтан пӗçереççӗ, мӗншӗн тесен пысăк температурăна бруцелла бактерийӗ чăтаймасть. Çавăнпа аш-какая кăлпасси цехӗсене ăстаççӗ.