«Тутарстанри халăхсен ача-пăча йăлисем»

Çакăн пек темăпа иртет хусансем юратса хутшăнакан, кӗтекен «Пурнăç йывăççи»

Августăн 7-мӗшӗнче 18.00 сехетре Хусанти Горький ячӗллӗ Культурăпа кану паркӗнче Тутарстанри тӗп халăхсен культурипе паллаштаракан фестиваль хусансемпе хула хăнисене пухать. Кăçал «Пурнăç йывăççи» çак тӗлтех июлӗн 3-мӗшӗнче иртнӗччӗ. Ун чухне нацисен туй йăлисем çинчен каласа панăччӗ, йăлисене кăтартнăччӗ. 

Хальхинче эпир тутар, вырăс, чăваш, удмурт, мари, мордва тата пушкăрт халăхӗсен ача вăййисене хутшăнăпăр, ачасемпе çыхăннă йăласене интересленсе пăхăпăр.
Мероприяти пуçланса вӗçленичченех «XX ӗмӗрти Атăлçи халăхӗсен ачалăх тӗнчи» сăнӳкерчӗксен куравӗ ӗçлӗ, мастер-классем йӗркелӗç. «Юмахри уçланкăра» Атăлçи халăхӗсен юмахӗсене каласа, кăтартса парӗç. Фестивалӗн чи тутлă кӗтесӗнче тăпăрчран апат хатӗрлеме вӗрентӗç, сăмавартан курăк чейӗпе сăйлӗç. 
Паллах, хальхинче концерт программине те ачасен пултарулăхне халалланă. Сакăр наци халăхӗн ачисен коллективӗсем пухăннисен кăмăлне çӗклӗç.
Спойлер — чăваш ачисен «Родничок» ансамблӗ Çӗнӗ Шуçăм районӗнчен килӗ. Çу пуçламăшӗнче иртнӗ II Фольклориадăна та хутшăннă вӗсем, «Созвездие — Йолдызлык» фестиваль сцени те астăвать пултаруллă «Родничока». 

Автор сăнӳкерчӗкӗ.