Наратлă каччисем салтака каясран тарса çӳремеççӗ

Салтакра пулман арçынна ялта хисеплемеççӗ. Ку каларăш кивелсе пырать тесе шутлать нумайăшӗ, анчах та унпа сывпуллашма васкамалла мар-ха. Хальхи вăхăтра çар хӗсметне иртмесӗр лайăх карьера тăваймастăн. Вăл кăна та мар. Салтак опычӗ арçын пурнăçӗнче ӗмӗр тăршшӗпе пысăк пулăшу тата тӗрек пулса тăрать.

Пӗкӗлме районӗнчи Наратлă ялӗнчи каччăсем те çавăн пек шутлаççӗ. Кунта ӳт-пӗве спортпа пиçӗхтернисӗр пуçне пневматика винтовкинчен тӗл пересси тата Калашников автоматне хăвăрт сӳтсе пуçтарасси те йăлара. Çак хăнăхусене кӗçӗнрех классенче вӗренекенсем те, выпускниксем те алла илеççӗ. Кунта тăратнă видеори пек 25 çеккунтра автомата хăш пӗр ăста салтак та сӳтсе пуçтараймасть. Артур Азизовăн рекорчӗ вара 21 çеккунт.