Шупашкарта чăвашсем ăçта кайса кӗнӗ?

Иртнӗ шăматкун, январӗн 18-мӗшӗнче, Шупашкарта Раççей тата Чăваш пичет кунӗсене паллă турӗç. Ытти çулсенчи пекех К.Иванов ячӗллӗ Чăваш патшалăх академи драма театрӗнче иртрӗ вăл. Журналистсен çулталăкри ӗçне пӗтӗмлетекен мероприятирен суварçăсем эпир те юлас темерӗмӗр. Хаçатăн тӗп редакторӗпе И.Ф. Трифоновăпа çак йӗркесен авторӗ ирпе ирех çула тухрăмăр. Чăваш Еншӗн чăвашсем, çаплах чăваш журналистики те, ытти регионсенче çуккине тахçанах хăнăхнă-ха эпир, çавăнпа республика тулашӗнчи чăваш кăларăмӗсем çинчен сăмахпа аса илессе те кӗтместпӗр. Пирӗн тӗллев ӗçтешсене, юлташсене, вӗрентекенсене курасси, чăваш журналистики паян мӗнпе пурăннине пӗлесси.

Мероприяти пуçламăшӗнче хаçатсем çинчен кăтартнă хăйăр графикинче çавăн чухлӗ чăваш саспаллине курсан савăнтăмăр та. Тинех ку уявра чăвашсене тивӗçлӗ тимлӗх уйăраççӗ пек туйăнчӗ. Анчах туйăнчӗ кăна çав, малалла йăлтах яланхилле пулчӗ. Цифра аталанăвӗн, информаци политикипе массăллă коммуникацисен министрӗ Михаил Анисимов та, регион Пуçлăхӗпе Михаил Игнатьевпа ытти тухса калаçакансем (Чăваш Республикин Журналистсен союзӗн председателӗ В.Комиссаровсăр пуçне) пӗр чăваш сăмахӗ те кăлармарӗç. Калăн, чăваш чӗлхи патшалăх чӗлхи те мар кунта. Чи тӗлӗнмелли –  «ч» саспаллие халалланă мероприятин йӗркелӳçисем сценари çырнă чух «ч» саспаллирен пуçланакан сăмахсен йышне, «Чебурашка», «чебуреки», А.Московскин «Чу-ча-чи» таранах кӗртнӗ, «чăваш» сăмаха вара темшӗн маннă, те ăнсăртран, те юри. Çавăнпа мероприятие ертсе пыракансенчен те, шкул ачисен урамри ыйтăмӗнчи ахаль халăхран та «чăваш» сăмах ăнсăртран та пулин тухса каймарӗ. Чăваш журналистикин кунӗнче те регион ертӳçи тăван чӗлхепе пӗр-икӗ сăмахпа та саламласшăн мар, халăх хăй чăваш пулнине урамра каласшăн мар пулсан, тăвансем, пирӗн халсем чăнах та лайăхах мар. Ку сăмахсене критиклес тесе мар, асатте-асаннесем ӗмӗрсем хушши упранă чӗлхене Шупашкарта паян ним вырăнне хуманнишӗн чӗре ыратнипе çыратăп.
Çапах та уявăн тӗп сăнарӗсем – журналистсем – патне таврăнар-ха. Чăваш Енре регистрациленнӗ массăллă хыпар хатӗрӗсем паянхи кун пӗтӗмпе 89, вӗсенчен 73-шӗ пичет кăларăмӗсем. Эппин, хаçат вулать-ха кунта халăх. Пичет министрӗ Михаил Анисимов сăмахӗсемпе, Елчӗк, Пăрачкав, Йӗпреç, Хӗрлӗ Чутай райхаçачӗсене районсенчи кашни иккӗмӗш çемье çырăнать. Паллах, хаçатăн тӗшшине тăвакансем – кунне-çӗрне пӗлмесӗр ӗçлекен журналистсем. Регион Пуçлăхӗ Михаил Игнатьев журналистсемпе полиграфистсене тăрăшуллă ӗçшӗн тав туса саламланă май, объективлăхпа яваплăх çинчен манмалла маррине тепӗр хут аса илтерчӗ. Америкăпа Европăри пурнăçа ятарласа мухтаса çыракансем хыççăн кайса халăха пăтратасран сыхланма ыйтрӗ.

Пичет, теле-радио журналисчӗсен ӗçӗн пӗтӗмлетӗвӗсем тăрăх, 2019 çулта та тухăçлă ӗçленӗ вӗсем. Тӗрлӗ шайри наградăсене илме сцена çине хăпаракансем кăçал та сахалăн марччӗ. Чăваш журналисчӗсен ӗçне пӗтӗмлетес йăла та кунта ӗнер-паян кăна пуçланман, 40 çула яхăн. Çак вăхăтра 100 ытла çынна, çав шутра «Сувар» хаçата та, чысланă. Кăçал Çемен Элкер ячӗллӗ премие пирӗн ентеш, Çӗпрел чăвашӗ, Наци телерадиокомпани директорӗн çумӗ Александр Магарин, Николай Никольский ячӗллӗ премие «Хыпар» хаçат  корреспонденчӗ Андрей Михайлов, Леонид Ильинăн премине Етӗрне район хаçачӗн редакторӗпе Екатерина Казаковăпа «Чувашия» телерадиокомпанин продюсерӗ Екатерина Фомина тивӗçрӗç. Ӗçтешсене пурне те çак хисепе тивӗçнӗ ятпа эпир те чунтан саламлатпăр. Малашне те пысăк çитӗнӳсем тума ăнăçу сунатпăр. (Сăнӳкерчӗксем cap.ru сайтран).