2024 çулта Алексеевскинчен Элмете çул кӗскелет

М-12 «Восток» автотрасса малашне Хусанпа Екатеринбурга çыхăнтарать. Кун çинчен ТР Раисӗ Р.Минниханов çулталăка пӗтӗмлетнӗ пресс-конференцире пӗлтернӗ.

 Республика ертӳçи каланă тăрăх, М-12 трасса Тутарстан территорийӗ тăрăх халӗ 142 километр иртет. Çырчаллипе Анат Камăна кӗмесӗр иртекенни тата 80-90 километр пулать. Малалла трасса Пушкăртстан урлă Екатеринбурга çитет. Ку вăл 2024 çула палăртнă ӗç-мӗн. Малалла М-12 трассăна Тюмене çитиех тăсас шутлă. Кунсăр пуçне республикăшăн пӗлтерӗшлӗ тепӗр Алекссевски — Элмет тӳлевлӗ çул тăрăх та 2024 çулта машинăсем çӳреме пуçлӗç.

— Ман шутпа, ку вăл йăлтах çӗршыв аталанăвӗ. Çӗршывăмăр компактлă та эффективлă пулса пырать. Паянхи кун тиевсен тӗп пайне автомашинăсем кӗске хушăсене, 1-2 пиншер километра, турттараççӗ. Çӗнӗ çул вăл территорисен аталанăвӗ кăна мар, экономикăна тӗрев, — тенӗ Рустам Нургалиевич çӗнӗ çулсем пирки. (Автор сăнӳкерчӗкӗ).