Ачасем 24 технологи проекчӗ хатӗрленӗ

Нумай пулмасть, тӗрӗсрех каласан октябрӗн 14 – 20-мӗшӗсенче, кунта форум иртнӗ, тесе пӗлтерет ТР Патшалăх управленийӗн цифра аталанăвӗн, информаци технологийӗсемпе çыхăну министерствин пресс-служби. Мероприятие çӗршыври 40 хулари ача-пăча технопаркӗсенче пӗлӳ илекен вӗренекенсем пухăннă. Вӗсем командăсене пӗрлешсе педагогсемпе наставниксем ертсе пынипе «Социум валли кирлӗ технологисем» темăпа ултă направленипе 24 технологи проекчӗ хатӗрленӗ. 

Форумра ачасем вӗрентӳ мероприятийӗсене хутшăннипе, проектсем хатӗрленипе кăна çырлахман. Çӗршывăн тӗрлӗ кӗтесӗнчен килнӗскерсене Тутарстан Республикипе паллашма та интереслӗ пулнă. Вӗсем Хусан Кремльне те, тӗп хулари Б.Рамеев ячӗллӗ IT-парка та, «Алабуга» ятарлă экономика зонине те, «Алабуга-политех» колледжа та, Элметри Нефть аслă шкулне экскурсие те, «КАМАЗ-мастер» спорт командин музейне те çитсе курнă.

Форумра йӗркеленӗ ăмăртура Кивӗ Оскол, Белгород тата Çырчалли хулисен пӗрлештернӗ команди пӗрремӗш вырăн йышăннă. Вӗсен «Территорие БПЛА пулăшнипе хăтлăх кӗртни» проектне экспертсем чи пысăк балсемпе хакланă. Иккӗмӗш вырăна Пензăпа Россошь хулисенчен килнӗ ачасен команди хăйӗн робототехника енӗпе хатӗрленӗ «Диджей-фреза» проекчӗ тивӗçнӗ. Виççӗмӗш вырăна Псковпа Чулхула ачисен «Вăрманти пушарсене çийӗнчех асăрхакан БПЛА» проекчӗ çӗнсе илчӗ. 

Тӗлӗнмелле проектсем хатӗрлеççӗ ачасем. Тепӗр чух аслисем те тавçăраймаççӗ ку меслетсем пирки. Ачасем вара ним çук çӗртен усăллă япаласем шутласа кăларма ăс çитереççӗ. Сăмах май каласан, ача-пăча технопаркӗсен форумне ахальтен мар Тутарстанра ирттерме йышăннă – республикăмăр инноваци технологийӗсене аталантарас енӗпе те малта пыракан регионсен йышӗнче. 
 
Вера АЛЕКСАНДРОВА.
Сăнӳкерчӗк digital.tatarstan.ru сайтран.