АЛ ÇЫРУСЕН КОНКУРСӖНЧЕ ÇӖНТЕРНИСЕН ХУШШИНЧЕ ПИРӖН ЕНТЕШ ТЕ ПУР
Ача-пăчапа çамрăксем валли кӗнеке кăларма чăвашла çырнă ал çырăвӗсен çуллен иртекен конкурсне пӗтӗмлетнӗ. Ăна ЧР Цифра аталанăвӗн, информаци политикин тата массăлла коммуникацисен министерстви ирттернӗ. Çӗнтерӳçӗсене укçа парса хавхалантарасси пирки калакан хушу çине ЧР Министрсен Кабинечӗн Председателӗ Олег Николаев ноябрӗн 7-мӗшӗнче алă пуснă.
Творчествăлла ăмăрту кăçал 11-мӗш хут иртнӗ. Хальхинче унта 10 автор 11 ал çырăвӗпе хутшăннă. Конкурсăн приз фончӗ 200 пин тенкӗпе танлашать. Çак укçана конкурс комиссийӗ ӗçсене пăхса тухса хакласан виçӗ çӗнтерӳçӗ хушшинче пайланă. Акă вӗсем:
«Шкулчченхи тата кӗçӗн классенче вӗренекенсем валли çырнă чи лайăх хайлав» номинацире «Сувар» хаçатăн çывăх тусӗн, Çӗпрел районӗнчи Çӗнӗ Йӗлмелӗнче çуралса ӳснӗ, халӗ Ульяновск хулинче пурăнакан Николай Ларионовăн «Микки мыскарисем» ал çырăвӗ çӗнтернӗ. Автора 50 пин тенкӗ парса хавхалантарма йышăннă;
«Вăтам классенче вӗренекенсем валли çырнă чи лайăх хайлав» номинацире Юрий Исаевăн «Çӗнӗ касăн шухă яшӗсем» ал çырăвӗ çӗнтернӗ. Автор 75 пин тенке тивӗçет;
«Аслă классенче вӗренекенсем валли çырнă чи лайăх хайлав» номинацире Сергей Павловăн «Шăпчăк çӗрӗпех юрлать» ал çырăвне çитекен пулман. Вăл та 75 пин тенке тивӗçнӗ.
Çӗнтерӳçӗсен алçырăвӗсемпе 2023 çулта патшалăх заказӗпе кӗнеке кăларма палăртнă.
Сăнӳкерчӗк Николай Ларионовăн социаллă сетьри страницинчен
Хамăр инф.
Следите за самым важным и интересным в Telegram-каналеТатмедиа
Нет комментариев