Анатолий Аринина фронта пулăшнăшăн медальпе чысларӗç

Ятарлă çар операцине хутшăнакансем хушшинче сăвăçсем те  пурри çинчен никам та шутламан. Анчах Виталий Гудырев хăйӗн чуна пырса тивекен тарăн  шухăшлă сăввисене вуласа парса иккӗленӗве сирчӗ. Чăваш Ен çинчен çырнă сăвви уйрăмах тӗлӗнтерчӗ. Каласа хăвармалла, Виталий Николаевич отпуск вăхăтӗнче Чăваш Енре темиçе хут та пулнă, ăна тăван Иркутскран кая мар юратать.

Мероприяти В.Н.Гудыревăн «Братья по судьбе» тата «Мы родною гордимся страной» сăввисемпе кӗвӗленӗ юрăсемпе малалла тăсăлчӗ. Çак хайлавсен кӗввине А.Н.Аринин çырнă, вӗсене «Данс-рок-капелла» вокалпа инструмент ансамблӗ Анатолий Николаевичпа пӗрле шăрантарчӗ. 

Виталий Николаевич студентсене фронтри пурнăçӗ, малти линири кулленхи ӗçсем çинчен пӗр пытармасăр каласа пачӗ. Строитель профессийӗ кирлӗ профес­си пулнине палăртрӗ. Студентсене вӗренӳре çитӗнӳсем тума сунса  çапла каларӗ: «Эсир илекен пӗлӳ питӗ кирлӗ, Раççейӗн çӗнӗ регионӗсене ура çине тăратмалла, эсир çак ӗçе хутшăнасса шанатăп». 

Тӗлпулура Виталий Гудыре­ва «Русская Академия Нравственности» организацирен  фронт журналистикин академикӗ ятне пачӗç.

Çак тӗлпулу патриотла пысăк ӗçӗн пӗр пайӗ çеç. Маларах Вырăс писательсен союзӗ хула администрацийӗ пулăшнипе «Любовь к Родине через преемственность поколений»  ыркăмăллăх литературăпа музыка мероприятийӗ ирттерчӗ, «Атăл» çыхăну батальонӗнче тăракансем шкул ачисемпе тӗл пулчӗç.   

Мускаври А.Н.Аринин ертсе пыракан организацисем пурнăçлакан проектсен тӗп тӗллевӗ – сăмах вăйӗ урлă патриотизмпа пӗрлӗх туйăмне ӳстересси, çемье хаклăхӗсене çирӗплетесси, йăхсен хушшинчи çыхăнусене аталантарасси тата пӗр-пӗрне итлеме, ăнланма вӗрентесси.

Тӗлпулура волонтер ӗçне те пысăк тимлӗх уйăрчӗç. Ятарлă çар операцийӗ пуçланнăранпах салтаксене пулăшнăшăн А.Н.Ари­нина 72-мӗш уйрăм мотострелоксен бригадинчен «Фронта пулăшнăшăн» медаль пачӗç. 

Светлана ЛУКИЯНОВА-ДЕМИРУС.

Автор сăнӳкерчӗкӗ.