БРИКС çӗршывӗсен туслăхӗ университетсен ӗçлӗ хутшăнăвӗсенче те аталанать

Ку эрнере Хусанти федераци университетӗнче «БРИКС ҫӗршывӗсен цивилизацийӗсем хушшинчи Диалог» мероприятисен серийӗ иртрӗ. Çак пулăма гуманизмла ылмашăнăва вăйлатассине, союза кӗнӗ ҫӗршывсен ырă пуласлăхне туса хурассине халалланӑ. Унсӑр пуҫне форумра Чжэцзян университечӗ (Китай Халăх Республики) пичетлекен кӗнекесен серине кӗнӗ «Китай живопиҫӗ ӗмӗрсем урлă» кӗнекен хăтлавӗ иртрӗ.

Мероприяти пуҫаруçисем — Китай Халӑх Республикин Патшалӑх Канашӗн Информаци бюровӗ, Тутарстан Республикин Правительстви тата Китайăн Хусанти Генеральнӑй консульстви. «БРИКС ҫӗршывӗсен цивилизацийӗсем хушшинчи Диалога» йӗркелекенсем — " У Чжоу" халăхсен хушшинчи коммуникаци центрӗпе Хусанти федераци университечӗ.

Мероприяти чылай хисеплӗ хӑна хутшӑннипе иртрӗ. Çавсен шутӗнче Китайри Коммунистсен партийӗн Тӗп комитечӗн пропаганда уйрăмӗн ертӳҫин çумӗ Ван Ган, Чжэцзян университечӗн вице-президенчӗ Чжоу Цзянхун, ТР Премьер-министрӗн çумӗ Лейла Фазлеева, Евразири Халӑхсен ассамблейин Генеральнӑй канашӗн председателӗ Светлана Смирнова, Иранăн Хусанти генеральнăй консулӗ Давуд Мирзахани тата ыттисем хутшăнчӗç. 
Мероприятие уçасси чаплă та анлӑн иртрӗ. Китайри хӗвелтухӑҫ оркестрӗн музыканчӗсем БРИКС çӗршывӗсен музыка хайлавӗсене вылярӗç: Бразилин «Ламбадине», вырӑссен «Калинкине», китайсен «Лян Чжуне» тата ытти ҫӗршывсен классика шутне кӗнӗ музыка хайлавӗсене. 

«Кӑҫал ноябрь уйӑхӗнче Хусанти федераци университечӗ 220 ҫул тултарнине палӑртать. Шӑпах ҫак ҫул пирӗн ҫӗршыва, Раççее, БРИКС çӗршывӗсене ертсе пыма тивни, Тутарстанăн тӗп хулине — Хусана патшалăх пуҫлӑхӗсен саммитне ирттерме шанса пани питӗ пӗлтерӗшлӗ, — терӗ ХФУ наука енӗпе проректорӗ Дмитрий Таюрский. — Хусан университетӗнче вӗренекен 12 пин ют çӗршыв студентӗнчен 3,5 пинӗ БРИКС çӗршывӗсенчен. Ку питӗ чыслă, çав вăхăтрах яваплă та».

Проректор университет союза кӗнӗ ҫӗршывсемпе тачӑ ҫыхӑну йӗркеленине палăртса хăварчӗ. Сӑмахран, Каирта (Египет) ХФУ филиалӗ ӑнӑҫлӑ ӗҫлет. Университетра «Аль-Хадара» арабсен культура центрӗ 20 ҫул ытла ӗҫлет. Аслă шкулта Китайăн 2000 çамрăкӗ вӗреннине те асăнса хăварчӗ. 
Малалла сăмах калакансен шутӗнче Ван Ган, Алердж Талита Бернардо (Бразили), конькипе эрешлесе ярăнассипе олимп чемпионки, Раҫҫей фигуристки Анна Щербакова, Раççейӗн тава тивӗçлӗ тренерӗ Тамара Москвина, Джавахарлал Неру (Инди) университечӗн Китайпа Кăнтăр-Хӗвелтухăç Азие тӗпчессипе центр директорӗ Б. Р. Дипак пулчӗç. Вӗсем те халăхсен туслă çыхăнăвӗсене аталантармалли, культура, спорт хутшăнăвӗсенче политика пулмалла марри çинчен каларӗç. 

Лейла Фазлеева Тутарстан Республикине Хӗвелтухăçпа Анăçăн ӗмӗрсем тăршшӗпе пыракан çыхăнăвӗн вырăнӗ тесе палăртрӗ. Раççей Федерацийӗн нумай нациллӗ субьекчӗн ырă тӗслӗхӗ пулнине каларӗ. 

«Вӗрентӗве уйрăм тимлӗхпе пăхатпăр эпир. Паян Тутарстанра Китайран кăна 2,5 пин студент вӗренет. Çак мероприятисен хӳттинче пирӗн университетсем хушшинче тачă çыхăну йӗркеленни уйрăмах савăнтарать. Пирӗн хутшăнусем БРИКС çӗршывӗсен хушшинчи наукăпа вӗрентӳ, культурăлла ылмашăнăва малашне тата та çирӗпрех тума тивӗç», — терӗ ТР вице-премьерӗ. 

Мероприяти Рустем Абязов ертсе пыракан Хусанти камерлă оркестр вылянипе вӗçленчӗ.

Сăнӳкерчӗксем ХФУ (КФУ) телеграм-каналӗнчен. https://t.me/kznuniversity