«БумБатл» экологи акци пуçланчӗ

ТР Экологи министерстви пӗлтернӗ тăрăх,  «БумБатл» вăл – хут парса çутçанталӑка упрама пулăшакан акци. Анчах, кирек мӗнле батл пекех, вӑл чи нумай хут пуçтарассипе ӑмӑрту та. Макулатура пуçтарнă çӗре ача сачӗсем, шкулсем, ВУЗсемпе, колледжсем, республикăри предприятисем тата уйрăм çынсем те кăмăл пулсан хутшăнма пултараççӗ. Кăçал Çемье çулталăкӗ пулнăран çемьепе те хутшăнма май пур.

Хутшӑнас текенсен макулатура пуçтарса ача садне, шкула е участник-компанисен офисне кайса памалла. Унта сире хут панă тесе акт параççӗ, йышăнакан пунктра сăнӳкерчӗк тусан та юрать.  Хут пухакан вырăнсене  бумбатл.рф проектăн официаллă  сайтӗнче тупма пулать, çавăнтах  регистраци иртсе акта е сăнӳкерчӗке портала лартмалла.

Акцие хутшăнакансене дипломпа парне парса хавхалантараççӗ.

Унсӑр пуçне креативлӑ постсен конкурсне те хутшӑнма пулать. Ун валли  ВКонтакте е Одноклассникинче #бумбатл, #экосистема, тата #нацпроектэкология   хэштегсемпе фото е видео кӑлармалла. Вӗсенчен 20-шӗ ятарлă парнесене тивӗçӗç.

Аса илтеретпӗр, пӗлтӗр Тутарстан Раççейри топ-5 региона кӗнӗ. Икӗ уйӑхра республикăра 185 тонна макулатура пухнӑ. Акцин тӗп тӗллевӗ  – экологи йăлисене йӗркелесси тата çутçанталăка сыхласа хăварасси.

Бумбатл.рф сайтран тунă скриншот.