Çанталăк ăшăтнăранпа Тутарстанра 4 ача чӳречерен ӳкнӗ

Уçă чӳрече хăрушлăхӗ пирки медицина, МЧС ӗçченӗсем тата ТР Ача прависен енӗпе уполномоченнăйӗсем çине-çинех асăрхаттарсан та, илтмӗш тăвакан ашшӗ-амăшӗсем пур-ха. 2025 çулта апрель-май уйăхӗсенче виçӗ ача чӳречерен ӳкнӗ пулсан, кăçал çак вăхăтра – тăваттăн. Шел, нумай чухне кун пек инкекре ача йывăр сурансене пула вилет е ӗмӗрлӗхе инвалид пулса юлать.

МЧС кун пек инкек ан пултăр тесен çакна асра тытмаллине асăрхаттарать:

*Пӳлӗме уçăлтарма чӳрече уçсан ачана пӗр минута та куçран вӗçертмелле мар;

*Чӳречене ытла пысăк уçăлса кайма чăрмантаракан ятарлă хатӗрсем (ограничитель) лартăр;

*Пӗчӗк ача чӳречене хăй тӗллӗн ан уçайтăр тесе чӳречесем çине блокиатор туянса лартма укçа ан хӗрхенӗр.

*Жалюзи е рулонлă чӳрече каррисемпе усă куратăр-тăк, çакăнса тăракан шнурлисене ан суйлăр – чӳрече сакки çине хăпарса ача унпа чăлханса пăвăнма пултарать.

* Ача чӳрече сакки çине тӳрех хăпарса ан кайтăр тесен чӳрече çывăхӗнчен мӗнпур сӗтел-пукана куçарăр.

*Ачăра чӳречене мӗнле уçмаллине ан кăтартăр. Мӗн чухлӗ каярах хăй тӗллӗн уçма вӗренет, çавăн чухлӗ хăрушсăрлăхра пулать.

*Ура айне пукан тавраш хурса чӳречерен е балконран пăхма та ан вӗрентӗр – ача ытлашши ӳпӗнсе чӳречерен тухса ӳкме пултарать.

*Ача 5-7-ре те килте пӗччен юлма хăрать-тӗк – ан хăварăр. Хăранипе ашшӗ-амăшне кӗтсе чӳречене е балкона уçса пăхма хăтланать вăл.

*Чӳречене уçнă пӳлӗмре ачана пӗр минута та хăйне кăна ан хăварăр.

*Ачана чӳрече сакки вылямалли вырăн маррине ăнлантарăр.