Чăваш Енри Медиацентра «Хыпар» Издательство çурчӗн директорӗн-тӗп редакторӗн çумӗ Дмитрий Моисеев ертсе пырӗ

Медиацентр масăллă хыпар хатӗрӗсене кăларса тăрӗ, республикăри интернет-ресурссене аталантарӗ, контент тăвӗ, медиасферăна тишкерӗ. Çавăн пекех вăл хаçатсен дизайнӗпе, версткипе, рекламипе те ӗçлӗ.

Палăртса хăвармалла Дмитрий Моисеев И. Н. Ульянов ячӗллӗ Чăваш патшалăх университечӗн журналистика факультетӗнче аслă пӗлӳ илнӗ, 2006 çулта «Çамрăксен хаçатӗнче» корреспондентра ӗçленӗ, 2009–2015 çулсенче унăн редакторӗ пулнă. 2016 çултанпа — «Хыпар» Издательство çурчӗн директорӗн-тӗп редакторӗн çумӗ. 2023 çулхи октябрь уйăхӗнчен пуçласа кăçалхи август уйăхӗччен Издательство çуртне вăхăтлăх ертсе пынă.

Дмитрий Моисеев – Раççей Федерацийӗн Журналистсен союзӗн, Тӗрӗк тӗнчин çамрăк çыравçисен союзӗн пайташӗ, Чăваш Республикин Çамрăксен патшалăх премийӗн лауреачӗ, кӗнекесен авторӗ. 

Дмитрий Андреевича, «Сувар» хаçатăн çывăх тусне, саламлатпăр! Çӗнӗ вырăнта пысăк çитӗнӳсем тума сунатпăр! 

Редакци архивӗнчи сăнӳкерчӗк.