«Чистые луга» заказникăн ӗçченӗсем Чистай районӗнчи шкул ачисене чи çепӗç уяв — Анне кунӗ — тӗлне сюрпризсем хатӗрлеме пулăшнă, тесе пӗлтерет Тутарстан Республикин Биоресурссен комитечӗн пресс-служби. Вӗсем вӗренекенсемпе пӗрле карасран çурта ăсталанă, фоамиранран чӗре евӗрлӗ упаковка тунă тата эко-чей пухнă.
Карасран йăваласа тунă çурта экологи енчен таса, унран пыл шăрши кӗрет. Çурта ăсталанă чух шкул ачисем пӗр-пӗринпе канашла-канашла ӗçлерӗç, кашниех хăйӗн фантазине пурнăçа кӗртме тăрăшрӗ.
Мастер-класс вăхăтӗнче ачасене аслисем чӗрчунсен тӗнчинчи чи лайăх аннесем — Латин Америкинчи шапа, кенгуру, коала, тӗлӗнмелле пысăк осьминог, аллигатор тата ыттисем — çинчен каласа пачӗç.
Мероприяти вӗçӗнче концерт кăтартрӗç, хăйсен амăшӗсем çинчен каласа пачӗç. Унтан чи çывăх çыннисене хăйсен аллипе тунă парнесене пачӗç.
Сăнӳкерчӗксем Тутарстан Республикин Биоресурссен комитечӗн пресс-службин.
Нет комментариев