Çитес çул Республика Уявӗ июлӗн 8-мӗшӗнче иртмелле

Ку ӗçре Нурлат районне тӗслӗхе тăратма пулать. Вӗсем кăçал питӗ илемлӗ «Уяв» кăтартрӗç, ЗАГСра чăвашла çырăнтарусем ирттереççӗ, чăваш çамрăкӗсен «Аталан» форумӗ те унтах кӗрлерӗ. Алмаз Ахметшин çине тăнипе хулари ача сачӗсенче те чăвашла вӗрентме тытăннă, ялсенчи шкулсенчи учительсенчен те çирӗп ыйтаççӗ. Ытти районсем те çак тӗслӗхпе ӗçлесен, чăвашлăх çӗкленессе кӗтме пулать.

Тутарстанри Чăваш наципе культура автономийӗн çитес çулхи ӗç планне çак мероприятисене кӗртнӗ.

Ача сачӗсемпе шкулсенче чăваш культурипе чӗлхине упрассипе ӗçлесси – çулталăк тăршшӗпе тумалли чи кирлӗ ӗç. Кун çинчен пирӗн пӗр самантлăха та манмалла мар.

Январь уйăхӗнче ТР ЧНКА Канашӗн ларăвне ирттерме палăртнă. Вăл е Хусанта е Сиктӗрме ялӗнче пулса иртӗ.

Февраль уйăхӗнче пур хуласемпе районсенче те Тăван чӗлхе кунне халалланă мероприятисем ирттермелле. Çавăн пекех февральте 2023 çулхи «Уява» ирттересси пирки ӗç ушкăнӗ канашлу ирттерӗ.

Март уйăхӗнче эпир аннесене саламланисӗр пуçне Теччӗ районӗнче йăлана кӗнӗ «Çăварни» уявне курăпăр тата çак районти чăвашла юрласа ташлакансен фестивальне.

Апрель уйăхӗн 25-мӗшӗ – Чăваш чӗлхи кунӗ. 2023 çулта ăна чăвашсене çутта кăларакан Иван Яковлевич Яковлев çуралнăранпа 175 çул çитнине халаллӗç.

Май уйăхӗнче Пăва районӗнче «Сувар» хаçат кубокӗшӗн регионсем хушшинчи шкул ачисен футбол турнирӗ иртмелле.  

Июньте Çӗпрел районӗ «Акатуйне» йыхравлать. Яланхилле вăл пӗр-пӗр чăваш ялӗнче питӗ илемлӗн иртет. Атăл ку енчи чăвашсем июнӗн вӗçӗнче Пăва районӗнчи Кипеккассине «Учук» тума пуçтарăнӗç, Кама леш енчи чăвашсем Элмет районӗнчи Патраклăна.

Июль пуçламăшӗ Аксу тата Нурлат районӗсенче «Уявпа» паллă пулӗ. Çак вăхăтрах Нурлат районӗнче ТР тава тивӗçлӗ юрисчӗн А.С.Огоневăн парнисемшӗн Кӗрешӳ турнирӗ иртмелле. Элкел районӗнчи Сиктӗрмере вара Республика «Уявӗ» пулать. Ăна июлӗн 8-мӗшне палăртнă. Июлӗн пуçламăшӗнчех Сиктӗрмере чăваш çамрăкӗсен «Аталан» пултарулăх фестивалӗ иртмелле.

Августра Хусанти кану паркӗсенчен пӗринче чăваш культурине халалланă «Пурнăç йывăççи» этнофестиваль иртет. Çавăн пекех Теччӗ районӗнчи «Чӳклеме» уявне те вырăнти влаçсем августа куçарасшăн, мӗншӗн тесен кăçал сентябрьте сивӗ кунсем пулчӗç.  

Сентябрь уйăхӗнче Республикăри «Чăваш шăпчăкӗ» фольклор фестивальне ирттерме палăртнă. ТР Культура министерстви тӗрев парсан, вăл Хусантах иртӗ.

Октябрьте пур районта та Чăваш наципе культура центрӗсенче Отчетпа суйлав конференцийӗсем иртмелле.

Ноябрь уйăхӗнче ТР ЧНКАн Отчетпа суйлав конференцийӗ пулать. Çак уйăхрах автономин çӗнӗрен суйланă Председателӗ Канашăн пӗрремӗш ларăвне ирттермелле.

Декабрь уйăхӗнче районсемпе хуласенче чăвашла чăрăш уявӗсем ирттермелле.

Ку пӗтӗмӗшле план. Унсăр пуçне кашни районти Чăваш наципе культура центрӗн хăйӗн ӗç планӗ пур. Вӗсемпе çулталăк тăршшӗпе паллаштарса тăрăпăр.

ТР ЧНКА Канашӗн пӗрремӗш çумӗ Константин Малышев.