Çӗнӗ Йӗлмелӗнче Александр Шуркин салтака халалласа ирӗклӗ кӗрешӳ турнирӗ 23-мӗш хут иртрӗ

Вӗсене саламласа меропритятие ертсе пыракан Реис Гафуров çак сăмахсене каларӗ:
-    Хисеплӗ ăмăртăва хутшăнакансем, чӗннӗ хăнасем, тата куракансем! Паян пирӗн шкулта эпир йăлана кӗнӗ каччăсемпе хӗрсем хушшинчи ирӗклӗ кӗрешӳ турнирне 23-мӗш зут ирттеретпӗр. Ăна пирӗн ентеше Чечняра çар тивӗçне пурнăçласа 1999 çулхи декабрьте паттăррăн çапăçса пуçне хунă Александр Шуркина халаллатпăр. Саша пирӗн шкулта пуçламăш классенче вӗреннӗ, унтан вӗсен çемйи Кивӗ Çӗпрелне куçнă. 1995-1998 çулта Теччӗри совхоз-техникумра вӗренсе «техник механик» дипломне илнӗ. Çак турнира çавăн пекех эпир Афганистанран Совет çарӗсене кăларнине те халаллатпăр, çывхарса килекен Тăван Çӗршыв хӳтӗлекенӗсен кунне те. 

23-мӗш турнир парадне Çӗпрел муниципаллă район ӗçтăвкомӗн ертӳçин социаллă ыйтусемпе ӗçлекен çумӗ Айрат Залялов, Çӗнӗ Йӗлмел ял хутлăхӗн пуçлăхӗ Роберт Дружков, Çӗнӗ Йӗлмелӗнчи вăтам шкул директорӗ Владимир Мискин хутшăнчӗç. Спорт уявӗн хисеплӗ хăнисен хушшинче Саша Шуркинăн амăшӗ Елена Ивановна тата тетӗшӗ Юрий, Алексей ывăлӗпе пурччӗ. Вӗсем çамрăк спортсме
нсене саламларӗç. Айрат Залялов турнира йӗркелекенсене ентешне манманшăн тав тунă май, паттăр ывăл çитӗнтернӗшӗн Александр Шуркинăн амăшне асăнмалăх парне пачӗ.  Ял хутлăхӗн пуçлăхӗ Роберт Дружков та çавнах турӗ. Елена Ивановна ывăлне хисепе хурса кашни çул турнир ирттерекенсене чӗререн тав турӗ, вăйлисене çӗнтерӳ сунчӗ. 
Çак турнир çулсерен тивӗçлӗ шайра ирттӗр тесе тăрăшакан Çӗнӗ Йӗлмелӗнчи патриотсене Тутарстан Республикинчи вăрçă ветеранӗсемпе запасри çар служащийӗсен регионти «Щит Отечества» общество организацийӗн медалӗсемпе Айрат Залялов чысларӗ. «Защитнику Отечества» медалье Николай Антипов тивӗçрӗ, «За активную военно-патриотическую работу» медале Владимир Мискина, Сергей Николаева, Николай Патшеева пачӗ.  
Раççей Федерацийӗн  патшалăх ялавне çӗклес чыса Çӗнӗ Йӗлмелӗнчи спортсмен-кӗрешӳçӗ Владимир Ефимов тивӗçрӗ. Çакăн хыççăн пухăннисем Александр Шуркина пӗр минут шăп тăрса асăнчӗç. 
Тӗп судья тивӗçӗсене ирӗклӗ кӗрешӳпе спорт мастерӗ Петр Рафиков, кавир ертӳçисем – Алешкин Саплăкри тренер Андрей Батанов тата Матакри Николай Чукмарев, хӗрринчи судья – Тимӗрçенри тӗнчипе паллă спортсменкăн ашшӗ Вячеслав Тражуков пулчӗç. 
Турнир вăхăтӗнче хăйсен тивӗçӗсене тӗрӗс-тӗкел пурнăçланăшăн вӗсене ăмăртăва йӗркелекенсем асăнмалăх сувенирсем пачӗç. 
60 ытла çамрăк кӗрешӳçӗшӗн çак турни черетлӗ тӗрӗслев пулчӗ. Арçыначасен хушшинче паттăр хӗрачасем пуррине курма кăмăллăччӗ. 17 медаль комплекчӗшӗн спортсменсем виçӗ çул категорине пӳлӗнсе кӗрешрӗç. 
Çакнашкал пысăк турнирсене спонсорсемсӗр ирттерме йывăр. Вырăнти усламçă, фермер Алексей Амосов, районти «Прогресс», «Фламинго», «Газприбор», «Уют» организацисем уйрăм тав сăмахӗсене тивӗçрӗç. 
Геннадий Карсаков, Çӗнӗ Йӗлмелӗнчи Ӗçпе вăрçă ветеранӗсен канашӗн председателӗ.