Çӗнтерӳçӗсене кĕркунне палăртаççĕ

Ӗçсене хакласан 300-тен кая мар финалиста палăртӗç. Вӗсен ӗçӗсене ятарлă сборникре пичетлесе кăларма палăртнă. Çӗнтерӳçӗсене октябрӗн 29-мӗшӗнчен пуçласа ноябрӗн 1-мӗшӗнче Самарăра иртекен «Наука будущего — наука молодых» Пӗтӗм Раççейри çамрăксен наука форумӗнче палăртӗç, хаклă парнесемпе чыслӗç. 

Наукăпа тӗпчев ӗçӗсен конкурсне пуринчен ытла Мускаври К. А. Тимирязев ячӗллӗ Ял хуçалăх академийӗн, Кубань патшалăх университечӗн, Г. В. Плеханов ячӗллӗ Раççей экономика университечӗн, Самарăри Королев ячӗллӗ университетăн, Байкал патшалăх университечӗн, Мускаври М. В. Ломоносов ячӗллӗ патшалăх университечӗн студенчӗсемпе аспиранчӗсем хутшăннă. Раççейӗн çамрăк тӗпчевçисемпе пӗрле çӗнтерӳшӗн пирӗн çӗршыври аслă шкулсенче пӗлӳ илекен ют çӗршыв студенчӗсем те тупăшаççӗ. Вӗсен шутӗнче Австрали, Вьетнам, Джибути, Египет, Иран, Китай, Конго, Кот-д, Ивуар, Латви, Тайвань, Туркменистан, Шри-Ланка тата СНГ çӗршывӗсенчен килнӗ студентсем пур. 

Конкурсантсем 10 сулăмпа тупăшаççӗ. Пуринчен ытла — 650 проект — социаллă наукăсемпе тăратнă. 400 авторпа коллектив гуманитари ăслăлăхӗсене суйланă. Инженери наукисемпе заявка паракансен шучӗ 300-пе танлашать. Пурнăç тата медицина, информаци технологийӗсемпе математика, Çӗрпе çыхăннă наукăсем, экологипе çутçанталăк, хими технологийӗсем, физикăпа астрономи, материалсем пирки наука — ку облаçсене суйлакансен шучӗ пӗр шайра. 

Конкурс 2014 çултанпа «Наука будущего — наука молодых» форум шайӗнче РФ Наукăпа аслă пӗлӳ министерстви тӗрев панипе иртет. Ăна Наукăпа технологисен вунă çуллăхӗн «Наука побеждать» пуçарăвне те кӗртнӗ. Форумăн дирекцийӗ — «Инконсалт» компани, наукăпа технологисене аталантарма пулăшакан патшалăх программисен операторӗ. 

Вера АЛЕКСАНДРОВА.