Çумăр çуни – тухăç ăнса çитӗнессе

Ака уйăхӗн 21­-мӗшӗ – Вадим. Шапасем кваклатаççӗ пулсан сӗлӗ акма юрать. Каçпа ăшă, çӗрле лăпкă пулсан çулла шăрăх та типӗ пулать. Ирхине тӗтреллӗ пулсан – çулла çумăр нумай çăвать.

Ака уйăхӗн 22­-мӗшӗ – Евпсихий. Çак кун çăлсене тасатаççӗ. Выльăх-­чӗрлӗхе кӗтӗве яма пуçлаççӗ. Уяр та ăшă пулсан тухăçлă çул пулать. Çумăр çуни – кăмпа ăнса пуласса.

Ака уйăхӗн 23-­мӗшӗ – Терентий. Çамрăк эрешменсем курăнчӗç­-тӗк – ăшăтать. Тӳпере çăлтăр нумай – тырă ăнса çитӗнет. Вӗçен кайăксем йăва çавăраççӗ-­тӗк – эппин çанталăк текех сивӗтмӗ.

Ака уйăхӗн 24-­мӗшӗ – Антип. Çак кун çӗр ӗçӗ тума юрамасть, мӗн акни шăтмасть теççӗ. Çумăр çусан çулла кăмпа нумай пуçтарма карçинккасем хатӗрле. Çурçӗртен çил вӗрет пулсан – çулла сивӗ пулать.

Ака уйăхӗн 25-­мӗшӗ – Василий. Çак кун çумăр çусан çулла йӗпе-­сапа пуласса кӗтмелле. Кун ăшă­-тăк – тухăçлă çул. 

Ака уйăхӗн 26-­мӗшӗ – Фомаида. Куккук хыттăн тата вăрăммăн авăтать-­тӗк – ăшă кунсем çитесси инçе мар. Тӳпере çăлтăр нумай – тухăçлă çул пуласса кӗт. Кăткăсем тăрăшсах ӗçлеççӗ – аван çанталăка.