Чун ăшшипе çыхнăскерсем

 – Ирина Васильевна, пӗртте ахаль лармастăр, шав алă ӗçӗпе аппаланатăр. Çулталăк пуçламăшӗнче пӗр парти ăшă нуски çыхса ятарлă çар операцийӗнче тăракан салтаксем валли те гуманитари пулăшăвӗпе парса янăччӗ. Халь тата çыхса ырă та пархатарлă ӗç тăватăр.

– Çапла, хăвăртрах вӗçлентӗрччӗ вăрçи, хӳтӗлевçӗ-салтаксем килӗсене сывă таврăнччăр. Ирхине Культура çуртӗнче йӗркеленнӗ волонтерсен ушкăнӗпе маскировка сетки çыхнă çӗрте тăрăшатпăр, каçхине, кил хуçалăхӗнчи ӗçсене вӗçлесен, алла йӗппе çăмха тытса нуски çыхма ларатăп.

Çак кунсенче Ирина 50 мăшăр çăм чăлха çыхса салтаксем валли парса яма хатӗрлесе ял хутлăхӗн кантурне кӗртсе пачӗ. Пирӗн тăнăçлăхшăн тăракансен урисем ан шăнччăр тесе чун ăшшипе çыхнă вӗсене. Кашни нускире Раççей ялавӗн виçӗ тӗсӗ сăнланнă –салтаксене хăвăртрах çӗнтерме хавхалантарни сисӗнет.

– Эпир ăшă пӳртре çывăратпăр, вӗсен вара тӗрлӗ условисенче пулма тӳр килет, маскировка сеткисемпе витӗнсе выртнине те илтнӗ. Пиртен ку пӗчӗк пулăшу пулсан та, чунӗсене ăшăттăр, – терӗ Ирина Краснова.

Волонтерсем çыру шăрçаласа ăшă нуски ăшне чикеççӗ. Часах вӗсен çырăвӗ палламан салтак патне çитсе ун чунне кăштах та пулин ăшăтасса шансах тăраççӗ. Çаплах нуски ăшне пылак кучченеç те хурса яраççӗ. Пурне те чӗрӗ-сывă таврăнма сунаççӗ.

Юрий АДЪЮТАНТОВ.

Çӗпрел районӗ,

Çӗнӗ Упи.

Автор сăнӳкерчӗкӗ.