Ҫемье ҫулталӑкӗнче Тутарстанра нумай ачаллӑ ҫемьесем 48 хваттер илнӗ

Иртнӗ ҫулта республикӑра 28 нумай ачаллӑ ҫемье тӳлевсӗр пурӗ 48 хваттер илнӗ. Кун пирки ТР Раисӗ ҫумӗнчи Патшалӑх кил-ҫурт фончӗн пресс-служби пӗлтерет. 

Нумай ачаллӑ ҫемьесене тӳлевсӗр хваттер пани "Жилье и городская среда" наци проекчӗн задачисене тивӗҫтерет. 

Хваттерсем соципотека ҫурчӗсенче вырнаҫнӑ, пурӑнма хатӗр, вӗсенче юсав ӗҫӗсене туса хӑтлӑх кӗртнӗ, пурӑнма  чи кирлӗ япаласемпе - сантехникӑпа, электричествопа тата газпа ӗҫлекен плитасемпе, пушар сигнализацийӗн датчикӗсемпе тивӗҫтернӗ. 

2025 ҫулта пилӗк ачаран сахал мар ӳстерекен тепӗр 24 ҫемьене тӳлевсӗр хваттер пама палӑртса хунӑ.