«Эхо веков в истории семьи – Тарихта без эзлебез» йăх-несӗл конкурсӗн Аксу районӗнчи тапхăрӗнче Чăваш Енрусьелӗнчи Еремеевсем çӗнтернӗ

Çуллен иртекен конкурса ТР Архив ӗçӗн патшалăх комитечӗ йӗркелет. Тӗллевӗ – çемье институтне çирӗплетесси, çемье çыхăнăвӗсене аталантарасси тата йăла-йӗркесене упраса хăварасси. Конкурс виçӗ тапхăрпа – муниципаллă, зонăри тата республика шайӗнчи – иртет.

Район тапхăрне икӗ çемье хутшăннă кăçал – Кивӗ Тутар Этемшӳ ялӗнчи Файзуллинсем тата Чăваш Енрусьел ялӗнчи Еремеевсем. Конкурсантсем йăх-несӗл историйӗпе çыхăннă презентаци, ал ӗçсен   куравӗ, наци апачӗ хатӗрлесе килнӗ, сцена çинче хăйсен пултарулăхне кăтартнă.

Конкурсантсем жюри пайташӗсене хăйсен çемйинчи йăла-йӗркепе паллаштарнă, хăйсен йăхӗнчи çынсен çитӗнӗвӗсем пирки каласа панă.

Конкурсăн иккӗмӗш тапхăрӗ сцена çинче иртнӗ – çемьесем хăйсен пултарулăхне кăтартнă. Несӗлӗсем юрланă халăх юррисене чуна тивмелле шăрантарнă.

«Эхо веков в истории семьи – Тарихта без эзлебез» йăх-несӗл конкурсӗн Аксу районӗнчи муниципаллă тапхăрӗнче чăваш çемйи – Еремеевсем – 1-мӗш вырăн йышăннă, 50 пин тенкӗ укçана тивӗçнӗ. Файзуллинсем 2-мӗш вырăнта, вӗсене 40 пин тенкӗ парса хавхалантарнă.

Халӗ район çӗнтерӳçисем зонăри тапхăра хатӗрленеççӗ.

Сăнӳкерчӗксем «Сельская новь» хаçатăн сайтӗнчен.