Ял-ял тăрăх сутса çӳрекенсенчен выльăх ан туян
Ящур, бруцёллез, оспа тата вак выльăхсен мурӗ пек хăрушă выльăх-чирлӗх чирӗсем енӗпе лару-тăру Раççейре, уйрăмах кăнтăрти регионсенче, пӗлтӗрхинчен лайăхланман. Сурăх-качака бруцёллезӗ, тӗслӗхрен, 41 регионта, çав шутра пирӗнпе кӳршӗллӗ Пушкăртстан Республикипе Самара, Оренбург облаçӗсенче те, палăрнă. Республика ветеринарӗсен паянхи тӗп задачи –ку чирсем республика территорине кӗресрен сыхланасси. Мӗншӗн тесен вӗсем экономикăна пысăк сиен кӳнисӗр пуçне çынсен сывлăхӗшӗн те хăрушă.
Июнӗн 16-мӗшӗнче тутарсен Курбан-байрамӗ. Тӗн йăлипе ку уявра сурăх-така пусмалла. Пӗлтӗр ятарлă площадкăсенче кăна 13816 пуç сурăх (вӗсенчен 5812-шне Хусанта) пуснă. Харпăр хуçалăхсенче мӗн чухлӗ пуснине шута илсен, ку кăтарту самай пысăк. Çавăнпа Курбан-байрам валли сурăх-такана урăх регионсенчен туянма тăрăшмалла марри çинчен ТР Министрсен Кабинечӗ çумӗнчи Тӗп ветеринари управленийӗн ертӳçин çумӗпе Г. Г. Мотыгуллинпа Россельхознадзорăн ветеринари надзорӗн Тутарстанри уйрăмӗн ертӳçи И.М. Гатин «Татар-информ» агентствăра пресс-конференцире асăрхаттарчӗç.
Тӗн ыйтнă пек пусмашкăн сурăх-качака пирӗн хамăрăн та çителӗклӗ, паянхи кун тӗлне республикăра 300 пин пуç. Тӗн уявӗсем валли ятарласа сурăх ӗрчетекенсем те пур. Çавăнпа йӳн хак тесе машинăпа сутса çӳрекенсенчен сурăх кăна мар, ытти выльăхпа чăх-чӗп, хур-кăвакал та туянмалла маррине каларӗç спикерсем. Мӗншӗн тесен кун пек усламçăсем сутакан выльăхсемпе кайăк-кӗшӗк чирлӗ маррине никам та шантараймасть. Выльăха вӗсем чир палăрнă хайхи регионсенчен кӳме пултараççӗ, çавăнпа нумай чухне вӗсен выльăх кӳме, сутма ирӗк паракан ветеринари докуменчӗсем çук. Сыхланакана Турă сыхлать тенешкел, И. М. Гатин машинăпа выльăх сутса çӳрекенсене курсан республика çыннисене тӳрех хăйсене пӗлтерме ыйтрӗ. Мӗншӗн тесен чир палăрчӗ-тӗк, хуçалăхри мӗнпур выльăха пусса çунтарма тивет. Кунсăр пуçне ку чирсем çынна ерес хăрушлăх та пысăк.
Курбан-байрам вăхăтӗнче республикăна çӳлерех асăннă хăрушă инфекци чирӗсем кӗресрен, сарăласран профилактика мерисен ыйтăвӗпе апрелӗн тата майăн 25-мӗшӗсенче ведомствăсемпе тата Мăсăльмансен тӗн управленийӗпе пӗрле ятарласа ларусем ирттернӗ.
Тӗслӗхрен, ветеринарипе санитари нормипе килӗшӳллӗн, Курбан-байрам валли выльăха уяв умӗн икӗ эрне маларах туянса карантинра тытмалла малтан. Бруцёллез чирӗ сурăх-качакара шăп 14 кунран кăна палăрать иккен.
Телее, хальччен Тутарстанра сурăх-качака бруцеллёз чирӗпе чирленӗ тӗслӗхсем пулман-ха. Çавăнпа малашне те ку мур республикăна ан кӗтӗр тесен выльăх сутакан-туянакан кашни хуçалăх, çын тимлӗ пулмалла.
Следите за самым важным и интересным в Telegram-каналеТатмедиа
Нет комментариев