Искусствăлла интеллект никӗсӗнче хута янă платформа Тутарстанри IT-парксенче тӗрӗслев иртет
Тутарстан Раççейре çӗнӗ ăру видеоаналитикине – сасă пулăшнипе ӗç тума пултаракан – хута яракан чи пӗрремӗш регион пулса тăчӗ. Искусствăлла интеллект (ИИ) никӗсӗнче хута янă NtechLab текен платформа IT-парксенче йӗркене пăснине тӗрӗслесе тăрӗ. Ку кăна та мар – вăл унта пыракансемпе тӳреммӗнех калаçма та пултарать.
Тутарстан Республикин Правительстви Санкт-Петербургри Халăхсен хушшинчи экономика форумӗнче NtechLabпа регионта ăна хута ярасси çинчен килӗшӳ тунă. Пилотлă площадкăсен вырăнне виçӗ IT-парка суйланă – иккӗшӗ Хусанта, пӗри Çырчаллинче.
Чи малтан çак платформа пулăшнипе юраман вырăнсенче пирус туртакансене тупса палăртассине тӗрӗслесе пăхаççӗ. Искусствăлла интеллект машина куçӗпе пирус туртакана курать те ăна туртма чарăнма ыйтать. ИИ сасă пулăшнипе тӗрлӗрен сăмах çаврăнăшӗсем калама пултарать.
«Ку видеоаналитика эволюцийӗн çӗнӗ тапхăрӗ. Çак технологи Раççейри цифра технологийӗсене пурнăçа кӗртес енӗпе чи малта пыракан регионсенчен пӗринче – Тутарстанра – тест иртнӗшӗн савăнатпăр çеç. Хусана çулсерен Раççейри кăна мар, ют çӗршывсенчи делегацисем те йышлă килеççӗ. Республика пурнăç пахалăхне ӳстерессинче искусствăлла интеллект никӗсӗнче тунă хальхи йышши технологисене хута ярас енӗпе хăйӗн опычӗпе ыттисене те паллаштарма пултарать», – тесе шутлать компанин генеральнăй директорӗ Алексей Паламарчук.
ТР патшалăх управленийӗн цифра аталанăвӗн, информаци технологийӗсемпе çыхăну министрӗн Айрат Хайруллинăн шучӗпе видеоаналитикăна хута яни республикăри тӗрлӗ сферăсенче хăрушсăрлăхпа эффективлăх шайне ӳстерме самай пулăшать. «Тутарстан Республики технологи прогресӗнче чи малтисен ретӗнче пулма тăрăшать, çавăнпа та эпир çӗнӗ йышăнусене хута ярассипе питӗ интересленетпӗр. Çӳлерех асăннă платформăпа хамăр IT-парксенче усă курма пуçлани – тӗрӗс йышăну, мӗншӗн тесен ăна тӗрӗслесе пăхма кирлӗ инфраструктура пирӗн пур. Хамăр региона цифра çине куçарассинчи тепӗр сулмаклă утăм ку», – тет Айрат Хайруллин.
Сасăпа ӗç тума пултаракан видеоаналитикăна малашне пилотлă режимпа Мускавра, Чулхулара, Крымра, Севастопольте, Мурманскра тата Архангельскра хута ярасшăн.
Асăннă компани патшалăхпа бизнес валли 32 çӗршывра, Раççейри 62 регионра масштаблă проектсем хута янă, «ăслă» хуласене, сывлăх сыхлавне, промышленноçа, транспорта тата ытти сферăсене кирлӗ йышăнусем шухăшласа кăларнă.
Сăнӳкерчӗк «Татар-информ» ИА.
Следите за самым важным и интересным в Telegram-каналеТатмедиа
Нет комментариев