Кӗçӗнпӳркелсем юбилее хатӗрленеççӗ

Кӗçӗн Пӳркелӗнче вара ял-йышшăн пысăк пӗлтерӗшлӗ кун тӗлне парк уçасшăн, йывăç-курăк ӳстересшӗн, канса ларма саксем, беседкăсем туса лартасшăн. Ра­йон администрацийӗ пӳркелсен пуçарăвне ырласа йышăннă, çӗр пайӗ уйăрса тата çутă кӗртсе пулăшса тӗрев пама пулнă. Паллах, кун пек пархатарлă ӗçрен ял-йыш айккинче тăрса юлман. Пултарнă таран хăйсен шутӗнчен укçа-тенкӗпе пулăшма шутланă. 

«Эпӗ хам çак ялта çуралса ӳснӗ, халӗ Хусанта пурăнатăп, çар гос­питалӗнче ӗçлетӗп. Яла кайсах тăратăп», – тесе пӗлтерет пире вулаканăмăр Наталья Михайлова.  

Пӗлтӗр кӗçӗнпӳркелсем ялтах çăлкуç тупнă. Сулăм укçипе ăна тасатнă, тирпейлесе çветить тутарнă. «Халӗ кӳршӗ ялсем те шыв илме çӳреççӗ. Ларса канма, пӗр-пӗринпе шăкăл-шăкăл калаçма меллӗ вырăн тăвасшăн», – каласа парать ялти хыпарсене Наталья Геннадьевна.

Ял-йыш обществăшăн усăллă ӗçсенче çеç мар, пӗрле пухăнса савăнăçлă канма, уявсем ирттерме те маттур иккен. Хӗллехи уявсене те хаваспах хутшăннă кӗçӗнпӳркелсем, уйрăмах февралӗн 23-мӗшне, Çӗршыв хӳтӗлевçин кунне, асра юлмалла лайăх палăртни çинчен каласа кăтартать Н.Михайлова. Çак кун конкурссем ирт­­терсе çӗнтерӳçӗсене парне­сем­пе савăнтарнă. Çăварние мăн асатте-асаннесен йăлипе савăнăçлăн ирттернӗ, Пӗтӗм тӗнчери хӗрарăмсен кунне те чаплăн паллă тунă. Пысăк концерт хатӗрленӗ клуб ӗçченӗсем. Нумай конкурса хутшăнса Гран-при илнӗ çамрăк юрăç Кирилл Константинов та хутшăннă унта. 

Хӗлле яла кайсан мăнуксемпе парка тухасси – ырă йăла. Унта ача-пăчана ярăнма тăвайккисем те туса панă. Шăпăрлансем хавас­пах ярăнаççӗ, аслисем килӗсене чӗнсе кӗричченех çӳреççӗ. Çитӗннисене уçăлса çӳреме те лайăх кунта. Çăва тухсан та парк çынсене хăй патне туртасси пирки иккӗленместӗп. Июнӗн 1-мӗшӗнче, Пӗтӗм тӗнчери ачасене хӳтӗлемелли кун та, ­Тро­ица кунӗнче те уяв программисем ирттерме пулать унта», – тет На­талья Михайлова.

Н.Михайлова сăнӳкерчӗкӗсем.