Кивӗмăкшелсем çурта тăваççӗ

МЮД ял хутлăхӗн пуçлăхӗ Татьяна Зюзина каласа панă тăрăх, çурта тума пушă консерва банкисем, картон, ăвăс (воск) тата парафин кирлӗ. Консерва банкисене ялта пурте кӳре-кӳре параççӗ Культура çуртне. Картона пушă коробкăсенчен илеççӗ, парафинне туянаççӗ. 

– Килӗштерсе ӗçлетпӗр: пӗри картон касать, тепри банкăсене тасатать. Çурта тăвакансем çак ӗçе кăмăлтан, чӗререн пурнăçлаççӗ. Кашни çуртана уйрăм çын тăвать-çке, ăна тунă чух вара салтаксем пирки шутлать, вӗсене хăйӗнчен пулăшу пултăр тет. Ку акцие хутшăнса эпир ятарлă çар операцийӗнчи салтаксене тӗрев парасшăн, вӗсене тав тăвасшăн, киле çӗнтерӳпе тӗрӗс-тӗкел таврăнма сунасшăн, – ăнлантарать ял хутлăхӗн пуçлăхӗ. 

Кивӗмăкшелсен çак пуçарăвӗ вăл – хамăр хӳтӗлевçӗсене пулăшас тесе пӗр пулни. Ял-йыш çак çуртасен пӗлтерӗшне, вӗсем салтаксене мӗнле пулăшу пама пултарнине питӗ лайăх ăнланать.
 
Людмила ЖАРЕНОВА.
Кивӗ Мăкшелӗнчи Культура çурчӗн архивӗнчи сăнӳкерчӗк.