Ку парта хушшинче пулас паттăр ларнă

– ТР Раисӗ Рустам Минниханов 2025 çула Тăван çӗршыв хӳтӗлевçин çулталăкӗ тесе йышăнни çав тери тӗрӗс. Тăван çӗршывăн хӳтӗлевçисен, çав шутра ятарлă çар операцине хутшăнакансен те, ячӗсене ӗмӗрлӗхе хăварас ӗçе малалла тăсмалла пирӗн. Вӗсем тăван çӗршывăн интересӗсене хӳтӗлесе пирӗн малашлăхшăн тивӗçлӗн кӗрешеççӗ. «Герой партти» хушшинче малашне чи лайăх вӗренекен, республика шайӗнчи обществăлла ӗçсене хастар хутшăнакан студентсем ларӗç. Хамăр салтаксен паттăрлăхӗн астăвăмне пулас ăрусем валли хăвармалла, – терӗ  Хусанти В.Г.Тимирясов ячӗллӗ инноваци университечӗн ректорӗ, «Новая школа» парти проекчӗн Тутарстанри координаторӗ Асия Тимирясова.

 Парттăна уçас церемоние Данил Саитовăн тăванӗсемпе çывăх çыннисем, вӗрентекенӗсем те килчӗç.

Аса илтеретпӗр, «Çӗнӗ шкул» наци проекчӗн хӳттинче «Единая Россия» парти 2018 çулта «Герой партти» Пӗтӗм Раççей акцине пуçарчӗ. Çапла майпа çамрăксене пысăк паттăрлăх кăтартнă хăюллă ентешсемпе паллаштарать вăл. Урăхла каласан, шкул парттисем çине мобильлӗ телефонсем валли QR-кодсем вырнаçтарать. Вӗренекен ун тăрăх  паттăрсем çинчен информаци вырнаçтарнă официаллă портала кӗрет. «Герой партти» уçăлакан вӗренӳ учрежденийӗсем пурте паттăрпа хăйпе çыхăннисем, урăхла каласан кунта вӗреннӗ вăл. 

– Университет ертӳçисене, юридици факультечӗн деканне Андрей Никитина пур енчен те пулăшса тăнăшăн тав тăватăп. Хамăр паттăрсене пурне те асра тытмалла пирӗн. Çитӗнекен ăрăва патриотизм воспитанийӗ парасси чи пысăк задача паян. Мӗншӗн тесен этем патриот пулса çуралмасть, патриот пулса тăрать, – тав турӗ ывăлне çапла чыс тунăшăн Минсифа Саитова.

Данил Саитов 2001 çулхи ноябрӗн 29-мӗшӗнче Сургутра çуралнă, 2013 çулта çемье Çӳлту районне куçса килнӗ. 2019 çулта кунти 2-мӗш шкула пӗтерсен Данил Хусанти В.Г.Тимирясов ячӗллӗ инноваци университечӗн колледжне «Право и организация социального обеспечения» специальноçа вӗренме кӗнӗ.

Яваплă та тăрăшуллă, ырă кăмăллă студент пек асра юлнă вăл кунта. Профессипе çыхăннă конкурссемпе олимпиадăсене хастар хутшăнаканскер, группăн старости те пулнă. 2021 çулта колледжран вӗренсе тухсан контрактпа çар службине тăнă. Реактивлă артиллери батарейин взвочӗн водитель-электрикӗ пулнă вăл. 

2022 çулхи сентябрӗн 25-мӗшӗнче Херсон облаçӗнчи Давыдов Брод ялӗ çывăхӗнче Данилăн подразделенийӗ хамăр салтаксене тăшман вут-çулăмӗнчен сыхланă май, тăшмана тапăнса кӗме те чарнă вăхăтра ентешӗмӗр юлташӗсене çăлса хăварнă, хăй вара вилмеллех аманнă.
Ятарлă çар операцийӗнче хăюлăхпа паттăрлăх кăтартнăшăн Данил Саитова патшалăх наградипе – Хăюлăх орденӗпе – чысланă.
 
Хамăр корр.
«Единая Россия» партин сăнӳкерчӗкӗ.