Лайăх хатӗрленсен лайăх иртет, çанталăк иккӗмӗш вырăнта

Пухăннă çынсене тата блиц-турнира (командăсем сахал мар пулнипе таймсем 15-шер минут кăна пычӗç) хутшăнакансене Пăва районӗн Ӗçтăвкомӗн ертӳçи Ленар Шакирзянов саламларӗ. Вăл ял халăхне пӗлтерӗшлӗ тата кирлӗ ӗç тунишӗн тав турӗ, уйрăм çынсен хастарлăхне тӗслӗхе тăратрӗ. Вӗсем футбоол турнирне кăна мар, яла та пысăк пулăшу кӳреççӗ. Турнира Ятарлă çар операцийӗнче хутшăнакансене халаллани те тăхăрьялсене сум кӳрет. Çак пӗлтерӗшлӗ кун ентешӗсене саламлама Элшел ялӗнче çуралса ӳснӗ флот офицерӗ, Чӗмпӗрти Подводник-моряксен союзӗн ертӳçи Алексей Мордовкин тата Каша ялӗнче çуралса ӳснӗ 2-мӗш ранг капитанӗ, Чӗмпӗрти «Морское братство» общество орагнизацийӗн председателӗ Александр Емелькин, Пăва районӗнчи Афган вăрçин ветеранӗсен, хӗрӳ вырăнсенче пулнă салтаксен пӗрлешӗвӗсен представителӗсем килнӗччӗ. «Боевое братство» общество организацийӗн пайташӗ Руслан Салимзянов Пăва районӗнчи Чăваш наципе культура центрӗн ертӳçи Владимир Ильин çамрăксем спорта аталантарнишӗн савăннине пӗлтерчӗ. Пăва районӗн чăвашӗсенче хăват пур, вăл спортра та, культурăра та, вӗренӳре те малалла кайма пулăшать. Палăртса хăвармалла, ăмăртура чăваш ялӗсен командисем кăна хутшăнчӗç пулсан та, турнира йӗркелеме пулăшакансен хушшинче тутарсен хушамасӗчем нумайччӗ. Çакă вырăнти халăхсен туслăхӗ çирӗп пулнине пӗлтерет. Çӗршыв умӗнче тăракан хăрушлăхсене çӗнтерме çынсем пӗрле, пӗр шухăшлă пулни пулăшать. Спорт вара пурне те пӗрлештерет. ТР ЧНКА Канашӗн Председателӗн çумӗ Константин Малышев, общество председателӗ, ТР Патшалăх Канашӗн депутачӗ Дмитрий Самаренкин алă пуснă Тав çырăвӗсене «Тăхăрьял кубокне» йӗркелеме пулăшакансене пачӗ. 
Ăмăртăвăн тӗп судйи Сергей Шайхутдинов вăйăн регламенчӗпе тата жеребевка йӗркипе паллаштарчӗ. Футболистсене йӗркерен тухмасăр, намăссăр сăмахсем кăшкăрмасăр, пӗр-пӗрне хисеплесе выляма ыйтрӗ. 
Çакнашкал пысăк мешехе хыçӗнче курăнман ӗç питӗ нумай, кашни вак-тӗвеке шута илмелле, пӗлмелле, вăхăтлă хатӗрлемелле. Пăва район Ӗçтăвкомӗнчи Спорт тата туризм уйрăмӗн пуçлăхне Ирина Ивановăна турнира ирттернӗ çӗрте пысăк пулăшу кӳнӗшӗн уйрăм тав сăмахӗсем калас килет.  Шемексен хастарлăхӗ те çӳллӗ шайра. Николай Мешковпа Валерий Михайлов тандемӗ кунта ыйтусене çийӗнчех татса пани хăй пурнăçӗнче чылай курнă çынсене те тӗлӗнтерет-тӗр. Чыс та хисеп вӗсене тата, паллах, пулăшаканӗсен вашават командине! 
Гакиль Камалетдинов сăнӳкерчӗкӗ.