Малашне Алексеевскинчен Элмете 1сехет те 40 минутрах çитме пулать

«Автострада» АО генеральнăй директорӗ Александр Комлев Хусанта, Kazan Digital Week форумра пӗлтернӗ тăрăх, ку çул строительствин хакӗ 102 млрд тенкӗ. Унăн 25 проценчӗ харпăр инвестици, 45 проценчӗ – Тутарстан, тепӗр 30 проценчӗ Раççей бюджечӗсен укçи.

Çулпа усă курнăшăн тӳлеве «Свободный потолок» системăпа илӗç. Çулпа пробка пек чăрмавсемсӗр пыма май парать вăл. М12 пысăк хăвăртлăхлă магистраль çинче те çак системăпах усă кураççӗ. Çапла майпа  аварисен шучӗ чакӗ, автомобильсен трафикне оптимизацилӗ. Шăп çак факторсем водительсене илӗртӗç те.

Асăннă тӳлевлӗ çул пӗтӗмпе 143 çухрăм пулать. Ун тăрăх Алексеевскран Элмете 1 сехет те 40 минутрах çитме май парать. 2035 çул тӗлне инвестор талăкри трафик сехетне 26,9 пин автомобильтен кая мар пуласса шанать.

Пысăк хăвăртлăхлă магистраль  – пуласлăх çулӗ. Сентябрӗн 8-мӗшӗнче пысăк хăвăртлăхлă М-12 магистралӗн  Мускав – Арзамас участокӗ уçăлнă хыççăн пӗр эрнерех унпа 300 пин ытла автомобиль усă курнă. Мӗншӗн тесен паха та чăрмавсăр кăна мар, çул вăхăтне çичӗ сехетрен  виçӗ сехет çурăччен чакарать. Апла-тăк, «Алекеевски – Элмет» çул те автомобилистсене илӗртесси иккӗленӳллӗ мар. (О.Бердникова сăнӳкерчӗкӗ).