Малашне Раççей шкулӗсенче ачасем хăйсене тыткалама пӗлнине хаклама пуçлаççӗ

Ачасем хăйсене шкулсенче тыткалама пӗлнине хаклассине юлашки икӗ çул хушшинче сӳтсе явнă. Ведомствăн пресс-служби пӗлтернӗ тăрăх, 2027 çул тӗлне нормативлă база туса хатӗрлӗç, педагогсем кирлӗ вӗрентӳ иртӗç.

РФ çутӗç министрӗн çумӗ Ольга Колударова тестировани çичӗ регионта  вӗçленнине пӗлтернӗ. Вăл 89 шкулта иртнӗ, 1-8-мӗш классенче вӗренекен 40 пин ытла шкул ачи тата икӗ пин ытла педагог хутшăннă унта.

Вăл каланă тăрăх, çӗнӗ система виçӗ баллă пулать:

• «Образцовое поведение» –  чи пысăк хак. Ăна дисциплинăна пăсман, тантăшӗсемшӗн тӗслӗх пулса тăракан, класпа шкул пурнăçне хастар хутшăнакан вӗренекенсем илӗç.
• «Допустимое поведение»  – тӗп шай. Вӗренекен шкул уставне пăхăнать, уроксене ирттерме чармасть, анчах шкул пурнăçне хутшăнсах каймасть.
• «Недопустимое поведение»  – пăшăрханмалли сигнал. Ку категорие тăтăшах кая юлса пыракансем, уроксене ирттерме чăрмантаракансем, вӗрентекенсемпе тавлашакансем, пӗрле вӗренекенсене кӳрентерекенсем, çапăçакансем тата шкул пурлăхне пăсакансем лекӗç.

Палăртмалла: çӗнӗ системăна кӗртни предметсен хаклавӗсем çине витӗм кӳмӗ. Анчах та вăл хавхалантарасси çинчен йышăнусем тунă чухне (сăмахран, лагере каймалли путевка) е, пачах урăхла, педсовета чӗннӗ чухне пӗлтерӗшлӗ аргумент пулма пултарать.