Ноябрӗн 3-мӗшӗнче «Тутарстанăн культура тӗп хули» конкурса пӗтӗмлетеççӗ

Кунта халăх уявӗсен тата ал ӗç ăстисен площадкисем ӗçлӗç. Республикăра пурăнакан халăхсен праçникӗсемпе – «Наурузпа», «Çăварнипе», «Каравонпа», «Çимӗкпе», «Уявпа», «Валда Шинясьпа», «Питраупа», «Гырон Быдтонпа» – интерактивлă куравра паллашма пулӗ. Ал ӗç ăстисем хăйсен ăсталăхӗпе мастер-классем ирттерсе паллаштарӗç. Халăх юррисене юрлакансене те итлеме пулӗ, анимациллӗ роликсем те кăтартӗç, ача-пăча фольклор коллективӗсем те хăйсен пултарулăхне кăтартӗç.

Кăмăл пуррисене çакăнтах иртекен «Этнографин пысăк диктантне» хутшăнма чӗнеççӗ. Вăл 11.00 сехетре пуçланать.

«Тутарстан Республикин тӗрленӗ картти» проектăн пӗтӗмлетӗвӗпе те паллаштараççӗ «Казань Экспора» – икӗ тӗрленӗ карттă тата 45 хăйнеевӗрлӗ алшăлли куракансене кăтартма хатӗр.

15.00 сехетре Наци культурисемпе йăлисен çулталăкне чаплăн хупас церемоние Тутарстан Республикин Раисӗ Рустам Минниханов та хутшăнать.

Çакăнтах «Тутарстанăн культура тӗп хули» конкурса та пӗтӗмлетеççӗ. Тинех ку ăмăртура хăш район çӗнтернине пӗлӗпӗр. Çӗнтерӳçӗ-района 3 миллион тенкӗлӗх сертификат параççӗ.