Октябрӗн 8-мӗшӗнче Хусантан Шупашкара «Метеор» каять

Нумай çул каяллахи пекех Хусантан Шупашкара «Метеорсем» çӳреме тытăнӗç. Октябрӗн 8-мӗшӗнче «Хусан – Шупашкар – Хусан» маршрутăн пӗрремӗш тӗрӗслевлӗ рейсӗ пулӗ. Ăна кăçал йӗркеленнӗ «Тутарстан Республикин флочӗ» компани пурнăçлать. Аса илтеретпӗр, компанин тӗллевӗ  шыв-шур тăрăх пассажирсем турттарасси тата туризма аталантарасси. Тулли хăватпа ӗçлеме тытăнман-ха вăл, мӗншӗн тесен кăçалхи сезонра  пассажирсем турттарма тендера тепӗр компани илнӗ. Çапах та кăçал август уйăхӗнчен шыв ай çуначӗллӗ вӗр-çӗнӗ икӗ «Метеор – 2020» караппа туристсене турттарма тытăннă та ӗнтӗ вăл. Карапсенчен кашни 120-124-шар вырăнлă, вӗсем çинче кафе, Wi-Fi, карап хӳри çинче пăхмалли площадка та пур. Çӗнӗ «Метеорсем» сехетне 70 çухрăм хăвăртлăхпа пыма пултараççӗ. 2024-2025 çулсенче компанин паркӗ тата тăватă «Метеорпа» пуянланӗ. (Автор сăнӳкерчӗкӗ).