Пирӗн паттӑрсене манма юрамасть

Ӑмӑртӑва йӗркелекенсем  – Рункӑри ял хутлӑхӗн канашӗ, вырӑнти тулли мар вӑтам шкул, салтакӑн тетӗшӗсем, тӑванӗсем. Çакнашкал турнир Пӑва районӗнче пӗрремӗш мар, шел пулин те. Чӑваш ачисем спортпа уйрӑмах туслӑ пулнипе-и, вӗсене халалласа футбол матчӗсене ирттереççӗ: Шемек, Элшел, Атав, халӗ ак Рункӑ. Сахалтарах пултарас килет те вӑл шута, ним тума çук – вӑрçӑра çухатусӑр пулмасть. Çамрӑк ачасем паттӑррӑн пуçӗсене хунипе мухтанмалли çук, мӑнаçланмалли сӑлтав вара – пурах. Ӑмӑртӑва уçнӑ вӑхӑтра сӑмах калакансем çакна палӑртрӗç те. Пирӗн патра тӑнӑçлӑх пултӑр тесе вӑй питти арçынсем паян çапӑçу хирӗнче пурнӑçӗсене шеллемеççӗ. Патриотизм – пушӑ сӑмах ан пултӑрччӗ ӳсекен ӑрушӑн.

Ӑмӑртӑва Пӑва районӗнчи Элшел, Мӑкӑр, Рункӑ тата кӳршӗри Елчӗк районӗнчи Лащ Таяпа командисем хутшӑнчӗç. Çанталӑк ӑшӑпа савӑнтармарӗ пулин те, курма килнисем сахалӑн марччӗ. Ростислав çак шкулта вӗреннӗ, унӑн амӑшӗ кунта ачасене чӑваш чӗлхипе литературине вӗрентнӗ. Пӗлӳ çуртӗнче ӗçлекенсем ентешне асӑнма икерчӗ пӗçернӗ, вӗри чей те пурччӗ ӑшӑнас текенсем валли. Шкул умӗнчи площадкӑра командӑсем - кашни енчен пилӗкшер çын. Матчсем хӗрӳ иртрӗç, никам та выляса ярасшӑн мар. Анчах та лайӑхрах хатӗрленни мала тухать. Элшелсем иккӗмӗш вырӑн йышӑнчӗç, рункӑсем – виççӗмӗш. Çӗнтерӳçӗ кубокне Чӑваш Республикин команди илсе кайрӗ. Асӑну турнирне кашни çул ирттерме палӑртаççӗ ялта.

Куçлӑхлӑ сарӑ каччӑ савӑнӑçлӑн пӑхса тӑрать пирӗн çине сӑнӳкерчӗкрен. Ун пек паттӑрсене манма юрамасть. Чунӗ çӑтмахра пултӑр.

Константин Малышев.

Автор сăнӳкерчӗкӗсем.