Виçӗмçул та, пӗлтӗр те, кăçал та Республика Уявӗнче шăрăх пулчӗ

Хӗвелӗ те, тен, çумăр çутаракан чăвашсен кӗллисене итлеме пăрахрӗ-тӗр. Мӗншӗн тесен ачасене хамăрăн чӗлхине вӗрентме чарăнтăмăр. Малашне йăласене кам тытса пырӗ? 
Çакă абстракциллӗ шухăш пулсан та, июль пуçламăшӗнчи шăрăхпа пирӗн мӗн-тӗр тумаллах. Е Аслă Уявăн вăхăтне май, июнь уйăхӗсене куçармалла, е, июльтех хăварсан, ăна каçпа ирттермелле. 
Историе пăхсан, Кӗçӗн Çимӗкрен Питравччен (хăшӗсем Микуларан Питравччен тесе шутлаççӗ) ял çамрăкӗсем Уява каç-кӳлӗм, тӗттӗмленсен тухнă. Питрав кунӗ кăна ăна кăнтăрла ăсатнă. Кӗрешӗнсем ирттереççӗ вӗт хăйсен наци уявне каçпа. Эпир мӗншӗн Уява Акатуй пек, кăнтăрла ирттеретпӗр? Уяв Акатуй мар. Çакна Чăваш Республикинчи юлташсене темиçе çул ӗнтӗ ăнлантарма тăрăшатпăр. Уяв вăл каччăсемпе хӗрсем каçпа тӗлпулса карталанса юрлани, выляни. Ăна ака-суха ӗçӗсемпе çыхăнтарни – йăнăш утăм.  
Сиктӗрмере иккӗмӗш хут Республика Уявне ирттернӗ хыççăн нумайăшӗ шутлаççӗ пулӗ, çитес Уяв ăçта тата хăçан иртет тесе. Ку ыйтăва ТР ЧНКА Канашӗ сӳтсе явса хăйӗн шухăшне çывăх вăхăтра пӗлтерӗ тесе шутлатăп.  
Çапах та, хам шухăша калас пулсан, чи шăрăх вăхăтра ирттермелле мар Уява, пирӗн ытлашши çын çук. Е ăна маларах вăхăта куçармалла, е каçпа ирттермелле. Юпа лартса çутă тăсасси – ялта та, хирте те пысăк йывăрлăх мар тесе шутлатăп. 
ТР ЧНКА Канашӗн Председателӗн çумӗ Константин Малышев.