Пысăк та туслă çемье – тӗп пуянлăх

Тыл ӗçченне Аксу районӗн Ӗçтăвкомӗн ертӳçин çумӗ Алексей Тимирясов тата Кивӗ Илтрекьел ял хутлăхӗн пуçлăхӗ Алексей Морозов çуралнă кун ячӗпе саламланă. Алексей Сергеевич ветерана çирӗп сывлăх, телей тата ырлăх-сывлăх суннă, Раççей Президенчӗн Владимир Путинăн саламлă çырăвне вуласа панă, чечек çыххипе парне панă. Ентешне Алексей Александрович та саламласа чи ыррине суннă. 

Ветеранăн пурнăç çулӗ çăмăл пулман. Евдокия Мироновнан ашшӗ Тăван çӗршывăн Аслă вăрçине хутшăннă, киле сывă таврăнайман, фронтра пуç хунă. Хӗрача колхозра ӗçленӗ, килти хуçалăха тытса пыма пулăшнă. Каярах Поликарп Пичуркинпа çемье çавăрнă, вӗсем пӗрле çичӗ ача – 4 хӗр тата 3 ывăл çитӗнтернӗ.

Мăшăрӗ вилнӗ хыççăн Евдокия Мироновна сакăр çул тăван килӗнче пӗчченех пурăннă. Каярах Галина хӗрӗ амăшне Хусана пурăнма илсе кайнă. Тутарстанăн тӗп хулинче Евдокия Мироновна 23 çул пурăннă. 2023 çулта кӗçӗн хӗрӗ  Димитровградран тăван ялне куçса килсен, амăшӗ те тăван ялне  таврăннă.

Евдокия Мироновнăн вунă мăнук, вунçичӗ кӗçӗн мăнук тата тăватă  кӗçӗн мăнукӗсен ачисем. Канмалли кунсенче вӗсем пурте пӗрле пухăнсассăн питӗ савăнать вăл. Пысăк та туслă çемье вăрăм ӗмӗрлӗ хӗрарăм шучӗпе чăн-чăн мăнаçлăх, пурнăç пӗлтерӗшӗ.

Зинаида Леонтьева.

Кивӗ Илтрекьел ял хутлăхӗн архивӗнчи сăнӳкерчӗкӗсем.